Михаил Мишустин: “Элбэх оҕолоох эдэр ыалларга 5 млрд солк. көмө харчы көрүлүннэ»
От ыйын 24 күнүгэр премьер-миниистир Михаил Мишустин: “Арассыыйа бырабыыталыстыбата оҕолоох эдэр ыалларга дьиэ сыанатын сорҕотун толуйарга анаан 5 млрд солкуобай көрүөҕэ”, — диэн биллэрдэ.
edersaas.ru
«Бу көмө бастатан туран, элбэх оҕолоох эдэр ыалларга ананыаҕа. Кинилэргэ саҥа дьиэ атыытын эбэтэр төлөнө сылдьар ипотека 35% сабар компенсация биэрэр туһунан бырабыыталыстыба уурааҕар илии баттанна», — диэн Мишустин бырабыыталыстыба мунньаҕар биллэрдэ.
Сыл бүтүөр диэри ити сыалга 5 млрд солк. бэриллэрин туһунан бигэргэттэ. «Бу миэрэ 15 тыһыынчаттан тахса эдэр ыалларга дьиэ боппуруоһун быһаарарга көмөлөһүөҕэ», — диэн премьер бэлиэтээтэ.
2019 сыллаахха Арассыыйа бырабыыталыстыбата элбэх оҕолоох ыаллар ипотечнай кэрэдьииттэрин сабыыга 450 тыһ. солк. кээмэйдээх төлөбүрдэри үллэрэр быраабыланы бигэргэппитэ. Бу бырагыраама 2019 сыл тохсунньу 1 күнүттэн 2022 сыл ахсынньы 31 күнүгэр диэри үс оҕоломмут ыалларга тарҕанар. Бырагыраама чэрчитинэн көрүллүбүт үп ипотечнай кэрэдьиит сууматын эбэтэр ааҕыллыбыт бырыһыанын сабыыга туһуланар.
Егор Карпов, «Саха сирэ» хаһыат, edersaas.ru