Михаил Мишустин: «Коронавируһунан ыалдьыбыттары кытта үлэлиир эмчиттэргэ ыстаастарын биир күннэрин иккинэн ааҕыахтара»
Хамсык дьаҥар ылларбыт пациеннары көрөр-истэр эмчиттэргэ биэнсийэлэрин ыстааһа икки бүк кээмэйинэн ааҕыллыаҕа, диэн бэнидиэнньиккэ РФ премьер-миниистирэ Михаил Мишустин хамсык тарҕаныытын бохсууга сүрүннүүр сэбиэт президиумун мунньаҕар эттэ диэн ТАСС иһитиннэрэр.
”Коронавирус дьаҥар хаптарбыт эбэтэр итиннэ уорбаланар ыарыһахтары эмтиир мэдиссиинэ үлэһиттэригэр биэнсийэлэрин ыстааһын ааҕыыга ураты бэрээдэги олохтуубут. Ыарыһахтарга биир күн көмөлөһүү икки үлэ күнүнэн ааҕыллыаҕа”, — диэтэ премьер.
Мишустин бу быһаарыы Арассыыйа бэрэсидьиэнин Владимир Путин сорудаҕынан ылыныллыбытын бэлиэтээтэ. Бу нуорма бу сыл тохсунньу 1 күнүттэн балаҕан ыйын бүтүүтүгэр диэри дьайыаҕа.
”Туһааннаах уураахха бырабыыталыстыба илии баттаата. Бу уураах көмөтүнэн сыл ахсын 4 тыһыынча быраас уонна мэдиссиинэ үлэһитэ биэнсийэҕэ эрдэ тахсар кыахтаныахтара”, — диэн бэлиэтээтэ Мишустин. Кини сыллата маннык биэнсийэ төлөбүрдэригэр 325 мөл. солкуобай эбии көрүллэрин уонна бу үп бүддьүөккэ көрүллүбүтүн эбэн эттэ.
Арассыыйаҕа коронавирус балаһыанньата
Михаил Мишустин Арассыыйаҕа хамсык балаһыанньата тупсубутун туһунан иһитиннэрдэ.
“Дойдуга балаһыанньа сыыйа тупсан иһэрин үрдүнэн биһиги мэлдьи кэтээн көрүүнү ыытабыт, ити ыалдьыбыттары суһаллык булар уонна кинилэргэ көмөлөһөр кыаҕы биэрэр”, — диэтэ бырабыыталыстыба баһылыга.
Кини бу дьаҥҥа дьону маассабайдык тиэстээһини ыытыы салҕанарын санатта, ити хамсык тарҕаныытын бохсууга дьайыылартан биирдэстэрэ.
Коронавирустан вакцина
Тустаах вакцина Арассыыйаҕа сотору кэминэн регистрацияланыахтааҕын туһунан РФ премьер-миниистирэ иһитиннэрдэ.
Кини бу инфекцияттан дойдуга оҥоһуллубут вакцина регистрацияны ааһарын кэтэһэллэрин эттэ.
Михаил Мишустин маны сэргэ күһүҥҥү-кыһыҥҥы улахан ноҕоруускалаах кэмҥэ балыыһалар уонна поликлиникалар туруктаахтык үлэлииллэрэ, оттон дьон суһал уонна былааннаах көмөнү толору кээмэйинэн ылаллара наадатын туһунан РФ бэрэсидьиэнин Владимир Путин ирдэбилин туһунан санатта. “Маныаха эрэгийиэннэргэ коронавирустаах ыарыһахтары эмтииргэ анал куойкалар саппааска баар буолуохтаахтар, ол иһигэр кирииптэн ыарахан туруктаммыт пациеннарга көмөнү оҥорорго”, — диэтэ миниистирдэр кэбиниэттэрин бас-көс киһитэ. Кини РФ Доруобуйа харыстабылын миниистирин Михаил Мурашкоттан бу эйгэҕэ балаһыанньа хайдаҕын уонна бырабыыталыстыба эбии дьаһаллары ылынара наадатын-суоҕун туһунан дакылааттыырыгар көрдөстө.
РФ Доруобуйа харыстабылын министиэристибэтэ атырдьах ыйын 7 күнүгэр иһитиннэрбитинэн, Н.Ф. Гамалея аатынан Эпидемиология уонна микробиология национальнай чинчийэр киинэ оҥорбут коронавирус дьаҥыттан вакцинаны регистрациялыырга наадалаах докумуоннар чинчийиигэ бэриллибиттэр. Өссө Роспотребнадзор “Вектор” вирусология уонна биотехнология судаарыстыбаннай научнай киинэ оҥорбут биир вакцината клиническэй чинчийиигэ ыытыллара чугаһаабыт. Нэһилиэнньэни маассабайдык вакцинациялааһыны алтынньы ыйтан ыытарга былаанныыллар.
Саппаас куойкалар
Коронавирус дьаҥар хаптарбыт ыарыһахтары эмтииргэ балыыһа куойкаларын туһаныыны эрэгийиэннэр былаастара кэтээн көрүөхтээхтэр уонна итилэргэ саппааһы бэлэмниэхтээхтэр, диэн РФ премьер-миниистирэ ыйда.
“Эрэгийиэннэр салайааччыларын болҕомтолоругар: дьаҥҥа хаптарбыт ыарыһахтары эмтээһиҥҥэ анал куойкалары туһаныыны кэтээн көрүүнү ыытыахха уонна сөптөөх саппааһы бэлэмниэххэ, ону тэҥэ сүрүн хайысханан туһаныллыахтаах куойкалары түргэнник бэлэмниир кыаҕы көрүөххэ, оттон наада буоллаҕына, инфекционнай ыарыһахтары эмтииргэ анаан хайысхатын уларытыахха”, — диэтэ бырабыыталыстыба бэрэссэдээтэлэ.
Кини этэринэн, ордук пуонда былааннаах мэдиссиинэ көмөтүн оҥорорго ыытыллыахтаах.
Бэлэмнээтэ Женни СТРЮКОВА
Хаартыска: www.gzt-sv.ru