Оонньуулар мэтээллэрэ
· - Дьулуур - Олох-дьаһах

Оонньуулар мэтээллэрэ

Аммаҕа Саха сирин норуоттарын VII спортивнай оонньуулара саҕаланара оруобуна алта хонук хаалла. Бэҕэһээ, өрөспүүбүлүкэтээҕи медиа-кииҥҥэ бу оонньууларга сыһыаннаах тэрээһин буолла. Манна Саха Өрөспүүбүлүкэтин физическэй култуураҕа уонна спорка миниистирэ Иннокентий Григорьев, Амма улууһун баһылыга Николай Архипов уонна СӨ Сибээскэ уонна информацияҕа миниистирин солбуйааччы Чокуур Гаврильев оонньууларга сыһыаннаах иһитиннэриилэри оҥордулар, ыйытыыларга хоруйдаатылар.

Пресс-конференция кэмигэр Саха сирин норуоттарын VII спортивнай оонньууларын кыайыылаахтарын уонна иккис-үһүс миэстэлээхтэрин наҕараадалыыр мэтээллэри көрдөрдүлэр. Ол курдук, Саха Өрөспүүбүлүкэтин физическэй култуураҕа уонна маассабай спорка управлениетын начаалынньыгын солбуйааччы Семен Говоров иһитиннэрбитинэн, мэтээллэр анал металтан киэргэтиллэн оҥоһуллубуттар. Сирэй өттүгэр спортивнай оонньуу официальнай бэлиэтэ, оттон кэтэх өттүгэр Амма улууһун бэлиэлэрэ: Амма өрүс уонна бурдук туораҕа ойууламмыттар.

Санатан эттэххэ, Саха сирин спортивнай оонньууларыгар барыта 246 кыһыл уонна үрүҥ көмүс итиэннэ 276 боруонса мэтээллэр оонньонуохтара.

Саха сирин Олимпиадатынан биллибит, түөрт сылга биирдэ ыытыллар күрэхтэһии Аммаҕа от ыйын 3-7 күннэригэр буолуоҕа. Спортсменнар спорт 16 көрүҥэр күрэс былдьаһыахтара, ол курдук, бокска, көҥүл тустууга, чэпчэки атлетикаҕа, остуол тенниһигэр, баскетболга, волейболга, буулдьанан ытыыга, спортиҥҥа, оҕунан ытыыга, саахымакка, дуобакка, мини-футболга, пляж волейболугар, аэробикаҕа уонна адаптивнай спорт чэпчэки атлетика, олорон эрэн волейбол көрүҥнэригэр.

Петр ПАВЛОВ.

Ааптар хаартыскаҕа түһэриитэ.

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

11 + 10 =