Мэхээлэ Боппуоһап бөтүүгү оҥоро сылдьар

Бөлөххө киир:

Таатта Уолбатын олохтооҕо Мэхээлэ Боппуоһап бу күннэргэ быйылгы скульптуратын бүтэрээри түбүгүрэ сылдьар. Бөтүүгүн каркааһын мастан, тимиртэн оҥорон баран, ноһуомунан бүрүйэр. Скульптура кээмэйэ улахан, үрдүгэ 3 миэтэрэ кэриҥэ. Олус хойуу кутуруктаах. Кини үүнэр сыл бэлиэтин ынах ноһуомуттан оҥорон, биир дойдулаахтарыгар бэлэхтээбитэ хаһыс да сыла буолла. Ол эрээри, “дьэ, быйыл хайдах оҥорор эбит” диэн өрөспүүбүлүкэ дьоно бары кэтэһэр.

Ангелина Васильева, «Саха сирэ» хаһыат, www.edersaas.ru

Мэхээлэ бүтэ илик оҥоһугун хаартыскаҕа түһэрэн тарҕаталларын сөбүлээбэт. Ол иһин бүччүм сиргэ, тиэргэнигэр оҥорор. Онтон дьэ, тыраахтарынан состорон, дэриэбинэ ортотугар, көстүүлээх сиргэ таһаарар. Хаартыскалар сонно өрөспүүбүлүкэ үрдүнэн тарҕаналлар.
Кини бэйэтэ сүөһүлээх, хаһаайыстыбалаах киһи буоларынан, түбүгэ үгүс. Ол да буоллар, быыс булан, Саҥа дьыл иннигэр хайаан да бүтэрэр дьүккүөннээх. Ат сылыгар үс улахан аты сүүрбэ күн иһигэр оҥорон бүтэрбитэ. Быйыл атаҕын өлөрөн, бытаара сырытта. Балыыһаттан соторутааҕыта тахсыбыта эрээри, скульптуратын бүтэрэ охсоору ыксыыр.


Урукку сылларга үс аты, козалары, эриэн үөнү, дракону оҥортообута. Кини скульптураларын уратыта – тимир арматураттан, мастан каркааһын оҥорон баран, ынах сааҕынан сыбыыр. Оҥоһуга эрдэттэн толкуйдаммыт дьайыылаах, сиппит-хоппут композиция буолан тахсар. Холобур, былырыын эбисийээнэлэрэ пальмаларга ыйанан тураллара уратытык көстүбүтэ. Ону тэҥэ кыыл быһыытын-таһаатын, туттан турарын оруобуна түһэрэр. Оҥоһуктара улахан кээмэйдээх буолаллар. Онон дьон болҕомтотун ылыан ылар.
Мэхээлэ худуоһунньук үөрэҕэ суох. Тырахтарыыһынан, механигынан, оскуолаҕа завхоһунан үлэлээбитэ. Арай, оҕолоро кыра эрдэхтэринэ, муустан скульптуралары оҥортуура.


Бастакы оҥоһуга – тааҥка этэ. Ыалын кытта оспуордаһан баран, дьиҥнээх тааҥканы оҥорон көрдөрүөм диэн эрэннэрбитэ. Кини аармыйаҕа тааҥкабай чааска сулууспалаабыта. Онон иһин-таһын үчүгэйдик билэрэ. Дьиҥнээх тааҥка саҕа тааҥканы оҥорон, биир дойдулаахтарын сөхтөрөн турар.

Аныгы дьон ынах сааҕыттан сиргэнэллэрин мин өйдөөбөппүн. Саханы саха гыммыт төрүт дьарыкпыт сүөһү иитиитэ буоллаҕа. Ноһуом – айылҕа матырыйаала. Өбүгэлэрбит сүөһү сааҕын ураты хаачыстыбаларын өйдөөн көрөн, балаҕаннарын сыбыыр буоллахтара. Онон аныгы дьон, ордук ыччаттар, ынах сааҕыттан сиргэммэттэрин, атын өттүттэн көрөн, ытыктыылларын туһуттан, бу скульптураларбын оҥоробун”, — диир Мэхээлэ Боппуоһап.


Киниэхэ былырыын улууска “Норуот скульптора” диэн ааты иҥэрбиттэрэ, наҕараада туттарбыттара.

Ангелина Васильева, «Саха сирэ» хаһыат, www.edersaas.ru

+1
0
+1
0
+1
0
+1
0
+1
0
+1
0
+1
0