Кылгас кэм иһигэр аан дойдуга өрө турбут коронавируһунан сибээстээн, мэдиссиинэ орто анал үлэһиттэрин, обсерватордарга үлэлиир дьону, тиэхиньиичэскэй үлэһиттэри коронавируһу бохсууга уонна бэйэни харыстаныыга үөрэтэр ирдэбилэ тирээбитэ. СӨ Үөрэҕин уонна наукатын министиэристибэтэ баар кыһалҕаны таба көрөн, тута кылгас болдьохтоох куурустары бэлэмнээбитэ.
Кууруһу ыытыыга туһааннаах министиэристибэ иһинэн үлэлиир мэдиссиинэ кэллиэстэрэ хото ылыстылар. Ол курдук, бырайыак түмүгэр өрөспүүбүлүкэҕэ, уопсайа, 9 тыһыынчаттан тахса киһи кууруһу ааһыахтаах.
Дьокуускайдааҕы мэдиссиинэ кэллиэһин дириэктэрэ Дмитрий Алексеев:
— Бүтүн Арассыыйа үрдүнэн COVID-19 ыарыынан ыарахан балаһыанньа үөскээбитинэн сибээстээн, обсерватордарынан, олорор сирдэринэн дезинфекция үлэтин ыытыы ирдэммитэ. Онон СӨ Үөрэҕин уонна наукатын министиэристибэтин дьаһалынан Дьокуускайдааҕы мэдиссиинэ кэллиэһэ 18 чаастаах ыраахтан олорон (дистанционно) үөрэх бырагыраамаларын бэлэмнээбиппит. Ол курдук, обсерваторга оҥоһуллар дезинфекциялар, онно үлэлиир дьон ыарыыттан көмүскэллээх буолалларын туһунан кууруһу ааһаллар.
Күн бүгүн обсерваторга үлэлиэхтээх 62 киһи үөрэҕи ааста. Аны СӨ Үөрэҕин уонна наукатын министиэристибэтин иһинэн үлэлиир орто анал үөрэх тэрилтэлэригэр обсерватордар аһыллыбыттарын быһыытынан, 54 үлэһити босхо үөрэттибит.
Итини таһынан, 432 чаастаах анал дезинфектор (спецдезинфектор) кууруһугар 12 киһи үөрэннэ. Кинилэр кууруһу аастахтарына сибэдиэтэлистибэ туталлар.
Итини сэргэ «основы дезинфекционного дела» диэн олох-дьаһах хомунаалынай хаһаайыстыбатыгар, салайар хампаанньалар (УК) үлэһиттэригэр анаан эмиэ 18 чаастаах үөрэҕи аспыппыт. Ол эрээри, күн бүгүн олох-дьаһах хомунаалынай хаһаайыстыбатыттан биһиги кыһабытыгар 2 киһи эрэ үөрэнэн дастабырыанньаны тутта.
Бу ыйыллыбыт салааларга үлэһиттэр ирдэнэллэрин билэр буолан, эрдэттэн барытын бэлэмнээбиппит. Дьон сурутта даҕаны тута үөрэппитинэн барабыт, — диэн иһитиннэрдэ.
Үөрэх ыраахтан олорон (дистанционно) барар. Мэдиссиинэ кэллиэһэ үөрэх бырагырааматын барытын хааччыйар, ыйан-кэрдэн, быһааран биэрэр. Куурус анал систиэмэнэн барар буолан, преподавателлэр ким хас чаас киирэн аахпытын, киинэни көрбүтүн, сорудаҕы, тестированиены төһөтүн толорбутун барытын көрөн олороллор. Онон үөрэх хаачыстыбалаах дииллэр. Онтон түмүгэр дезинфекцияны оҥорор киһи таҥаһын хайдах сөпкө кэтэриттэн саҕалаан, ыраастааһыны хайдах ыытарыгар тиийэ барытын көрөллөр. Сэҥээрбит дьон Дьокуускайдааҕы мэдиссиинэ кэллиэһигэр билсиэххитин сөп.
Кууруһу ыытар орто анал үөрэх тэрилтэлэрэ:
- Алданнааҕы мэдиссиинэ кэллиэһэ (Алданский медицинский колледж). Билсэр төлөпүөҥҥүт: 8(411 45) 37037, электроннай аадырыс: amk.dpo@mail.ru
- Дьокуускайдааҕы мэдиссиинэ кэллиэһэ (Якутский медицинский колледж). Билсэр төлөпүөҥҥүт: 8(4112) 227154 эбэтэр 8-924-168-26-29, электроннай аадырыс: ymedk@gov14.ru , opdoymk@mail.ru
- Нерюнгритааҕы мэдиссиинэ кэллиэһэ (Нерюнгринский медицинский колледж). Билсэр төлөпүөҥҥүт: 8(411 47) 60146, электроннай аадырыс: nmk_nerungri@gov14.ru ⠀
- Жатайдааҕы тиэхиньикум (Жатайский техникум). Билсэр төлөпүөҥҥүт: 8(4112) 426407, электроннай аадырыс: zhataytekh@yandex.ru
Людмила ПОПОВА, “Саха сирэ” хаһыат, edersaas.ru