Мэҥэ Хаҥалас улууһун уопсастыбанньыктара маҕаһыыннарга сыананы үөрэттилэр

Ааптар: 
Бөлөххө киир:

Коронавирус куттала үөскээбитинэн сибээстээн, батсаапка маҕаһыыннарга сыана үрдээбитин туһунан суруйуулар төһө кырдьыктаахтарын билээри, Мэҥэ Хаҥалас улууһун уопсастыбанньыктара «Майа сэлиэнньэтэ» МТ баһылыга Дмитрий Тихонов көҕүлээһининэн, ас-үөл маҕаһыыннарыгар сыана үрдээһинин уонна саппааһын үөрэттилэр.

edersaas.ru


Бу тэрээһин туһунан улуустааҕы уопсастыбаннай тэрилтэлэри сүрүннээччи Зиновий Игнатьев кэпсиир:

Биһиги «Манчаары», «Азия», «Бону» уонна «Экономь» маҕаһыыннарга сырыттыбыт. Маҕаһыыннар долбуурдара араас табаарынан тобус-толору.

Сыана үрдээбэтэх, ааспыт нэдиэлэтээҕинэн турар. Арай, 6-8 солкуобайынан рис уонна гречкэ курууппалар сыаналара ыараабыт.

Чэй, туус  сыаната — уруккунан. Кырыы кырыытынан кыстанат турар.

Оҕуруот аһа уонна фрукта арааһа эмиэ дэлэй— киһи хараҕа халтарыйар.

Үлэһиттэри кытта кэпсэппиппитигэр, ас-үөл  саппааһа баарын уонна саҥа табаар кэлэ турарын иһитиннэрдилэр. 

Бары маҕаһыыннартан санитарнай ирдэбили тутуһан олорор «Экономь» маҕаһыын эбит. Үлэһиттэрэ мааскалаах, бэрчээккэлээх үлэлии олороллор.

Биһиги сылдьар кэммитигэр муоста сууйааччылар маҕаһыын саалаларын сото сылдьаллара. «Экономь» сыаналара, аата да этэрин курдук, чэпчэки эбит.


Ааспыт нэдиэлэҕэ дьон «маҕаһыыны көһөрө» сыыспыттарын туһунан үлэһиттэр олус сөҕө-махтайа кэпсииллэр. 

Онон «араас күүркэтиилээх иһитиннэриилэри истэн, дьон табаар хамаҕатык барар усулуобуйатын тэрийдилэр» диэн атыыһыттар этэллэр.  


Зиновий Иванович атыы-эргиэн тэрилтэлэригэр биир түгэни олус соһуйа көрбүтүн эбэн биэрдэ:
— Бэрэбиэркэҕэ сылдьыбыт маҕаһыыннарбытыгар карантинҥа олорор оскуола оҕолоро элбэхтэрэ бэрт эбит.  Туох да мааската суох көҥүл сылдьаллар. Уулусса эмиэ оҕонон толору. Кутталлаах балаһыанньаҕа төрөппүт оҕото дьиэҕэ олорорун  хонтуруоллуон наадын бэлиэтии көрдүм. 

Кырдьык, бастаапка оскуола оҕолоро уулуссаҕа көҥүл күүлэй тэбэ сылдьалларын туһунан үгүстүк суруйан эрэллэр.  Онон коронавирус эпидемията турбутунан сибээстээн муҥутаан биллэриллибит ыксаллаах балаһыанньаҕа төрөппүт оҕотун хонтуруоллуура наада. Билигин үгүс дьон дьиэҕэ олорон үлэлиир буоллулар. Онон оҕо уулуссаҕа сылдьарын бэрэбиэркэлиэххэ сөп.

Оттон Мэҥэ Хаҥалас уопсастыбынньыктара маҕаһыыннарга сыана үрдээһинин хонтуруоллууллара атын улуустар уопсастыбанньыктарыгар — бастыҥ холобур. Сорох хоту улуустарга болдьоҕуттан тахсыбыт бородуукта элбээбитин туһунан социальнай ситимнэргэ эмиэ суруйаллар.  Онон уопсастыбанньыктар биир сырыы оҥорон, сыана үрдээһинин уонна болдьоҕуттан тахсыбыт бородуукталары эмиэ бэрэбиэркэлиэхтэрин сөп. Билигин ханнык да хонтуруоллуур уорганнааҕар уопсастыбанньактарга бары атыы-эргиэн тэрилтэлэригэр — «күөх уот».

Елена ПОТОЦКАЯ, «Саха сирэ» хаһыат, edersaas.ru

Зиновий Игнатьев уонна Александр Шадрин хаартыскаларга түһэриилэрэ.

+1
0
+1
0
+1
0
+1
0
+1
0
+1
0
+1
0