Дуобат аан дойдутааҕы федерациятын (ФМЖД) көҕүлээһинэн, 100 харахтаах дуобакка Европа уонна Америка континеннарын сүүмэрдэммит хамаандаларын интернетинэн онлайн-матчтара түөрт күн ыытыллан түмүктэннэ.
Хамаанда аайы уоннуу спортсмен талыллан, бэйэ-бэйэлэрин кытта утары 10 түһүмэххэ күрэхтэстилэр. Ол аата, Матрена, Америка хамаандатын дуобатчыттарын барыларын кытта күөн көрүстэ. Үөрүүлээҕэ диэн, бу онлайн-матчка 111:89 ахсаанынан кыайыыны Европа хамаанда ситистэ. Ол аата, биһиги Матрена Ноговицынабыт, билигин төһө да аан дойду үрдүнэн коронавирус ыарыыта тэнийэн, күрэхтэһиилэр тохтоон турдаллар, быйылгы спортивнай көрдөрүүтүгэр, “Европа-Америка хамаандаларын онлайн-матчтарын кыайыылааҕа” диэн ааты ылла. Кинини бу ситиһиитинэн эҕэрдэлиэҕиҥ!
Бэҕэһээҥҥи сырдатыыбытын салҕаатахха, кэнники үс түһүмэххэ Матрена – Карлос Ловерилы (CWO), Кенсор Сайлоры (Гаити) кыайталаата, оттон бүтэһик түһүмэххэ Игорь Рыбаковтыын (АХШ) тэҥнэстэ. Онон кини бу онлайн-мачтка барыта 3 кыайыылаах, 6 тэҥнэһиилээх уонна 1 хотторуулаах. Итиэннэ оонньуу хаачыстыбатынан көрөн, биирдиилээн түмүк таһаарыыга 12 очукуолаах, барыта 20 кыттааччыттан – алтыс көрдөрүүлэннэ. Бу үчүгэй көрдөрүү.
Оттон, Россияттан оонньообут иккис дуобатчыт – Александр Гетманскай (Тула) 8 очукуолаах 14-с көрдөрүүлээх.
Санатан эттэххэ, Чурапчы Мугудайыттан төрүттээх Матрена Ноговицына 2019 сыл түмүгүнэн Олимпиадаҕа киллэриллибэтэх спорт көрүҥнэргэ Саха Республикатын лауреатынан талыллыбыта. Кини – былырыыҥҥы сылга дуобакка аан дойду чемпионатын түргэн оонньууга хамаанданан чемпиона, норуоттар икки ардыларынааҕы турнир кыайыылааҕа, аан дойдутааҕы Интеллектуальнай оонньуу үрүҥ көмүс призера, Европа чемпионатын боруонса призера буолбута. Тренерэ – СР үтүөлээх тренерэ Н.Н. Кычкин.
Петр ПАВЛОВ, dzulurgan.ru