Өймөкөөн улууһун Үчүгэйин кырачаан олохтооҕо, икки саастаах Марсель Находкин бу сарсыардата эдьиийдээх убайа оҥорбут хаар киһилэрин «рекламалыырыттан» саҕаланна.
edersaas.ru
Үс оҕолоох эдэр ыал Находкиннар дьиэ кэргэн Үчүгэй нэһилиэгэр олохсуйбуттара номнуо алта сыл буолбут.
— Мин манна олохтоох оскуолаҕа химия учууталынан үлэлиибин. Бастаан кэргэним Алексей үөрэҕин бүтэрээт, Үчүгэйгэ ананан кэлбитэ. Хоту дойдуну сөбүлээн, биһигини көһөрөн аҕалбыта. Аҕабыт билигин ОДьКХ-ҕа үлэлиир. Улахан уол Проня — 7-с, орто уол Миша 4-c кылаастарга үөрэнэллэр.
Бу сарсыарда хаар түспүтүн көрөн үөрэн, оҕолор чэйдээт таһырдьа ыстаммыттара уонна хаар киһини оҥоро охсубуттара. Кырачаан уолбут убайдарыттан хаалсыбакка, кинилэри батыһан тахсан, бэлэм хаар оҥоһугу үйэтитэр дьоллонно.
Бу хаартысканы дьоммутугар Уус Алдаҥҥа, табаарыстарбытыгар, ыалларбытыгар ыыппыппыт. Онтон аҕыйах чаас буолан баран, Марсель бу хаартыската батсаабы, инстаграмы толорбут сураҕа иһиллибитэ. Онон социальнай ситим түргэн үлэлээҕин сөҕөн олоробут, — диэн кэпсиир кырачаан дьоруой ийэтэ Ньургуйаана Находкина.
Оттон биһиги элбэх оҕолоох дойду ыччаттарыгар — Находкиннар дьиэ кэргэттэригэр ыраах, тыйыс усулуобуйалаах тымныы полюһун сайыннарар соруктаах үлэлии сылдьалларыгар махталбытын тиэрдэбит.
Елена ПОТОЦКАЯ, «Саха сирэ» хаһыат, edersaas.ru
Хаартыска: батсааптан