“Манчаары оонньууларын” көрсө Бэрдьигэстээххэ спортивнай киин бастакы сыбаайатын түһэрдилэр
Олунньу 22 күнүгэр Бэрдьигэстээххэ «Демография» национальнай бырайыак чэрчитинэн Элбэх хайысхалаах спортивнай киин бастакы сыбаайатын түһэрдилэр. 2021 сылга Горнай улууһугар “Манчаары оонньуулара” успуорт национальнай көрүҥнэригэр XXI спартакиада буолуоҕа. Сүрүн спортивнай күрэхтэһиигэ бэлэмнэнии үлэтэ номнуо саҕаланна.
СӨ Тутуутун министиэристибэтэ иһитиннэрэринэн, манна уопсайа үс эбийиэк тутуллуоҕа: 1000 миэстэлээх стадион, 50 миэстэлээх сыал ытар саала уонна Элбэх хайысхалаах спортивнай киин. 400 көрөөччү мустар миэстэлээх 2 478 кв. м иэннээх икки этээстээх саалаҕа хамаанданан оонньуур успуорт көрүҥэр волейболга, баскетболга, дьоҕус футболга күөн көрсүөхтэрэ. Ону таһынан, буоксаҕа киирсэр, эрчиллэр саала, быраас, тириэнньэрдэр, судьуйалар, пресса хоһо, суунар хостор баар буолуохтара.
Саҥа спортивнай эбийиэк 235 мөлүйүөнтэн тахса солкуобайга тутуллуоҕа, онтон 168,4 мөлүйүөнэ «Демография» национальнай бырайыак «Успуорт – олох көрдөрүүтэ» хайысхатынан федеральнай киинтэн үбүлэнэр.
“Манчаары оонньууларын” ыытарга 2017 сыллаахха алта улуус күрэхтэһэн, Горнайдар кыайбыттара. Онон Бэрдьигэстээххэ улахан тутуу барыа.
«Саха сирэ», edersaas.ru