Саха сиригэр интэриниэт сайдыытын кытта тэҥҥэ араас интэриэһинэй хайысхалар арыллан, дьон кыаҕын араастык туһанар буолла. Ол курдук, билигин аан дойду үрдүнэн биир киэҥник тарҕаммыт саайтынан YouTube.com буолла. Манна дьон араас хабааннаах видеоларын угар, ону интэриэһиргээччилэр көрөллөр, ырыталлар. Аны бу саайтка киинэ, мультик арааһа баара сөхтөрөр.
Өрөспүүбүлүкэбитигэр инстаграм-блогердар олус элбэхтэр. Оттон ютуб-блоггинг саҥа сайдан эрэр. Номнуо үс “үрүҥ көмүс кунуопкалаах” блогердаахпыт – Эдьигээҥҥэ олорор балыксыт Вячеслав Бродников уонна Ньурбаттан өрөспүүбүлүкэ устуоруйатын, олоҕун-дьаһаҕын кэпсиир Олесь Петрович, «Охота и рыбалка в Якутии» биэрии. Маннык кунуопканан “YouTube” хампаанньа 100 тыһыынча сурутааччылаах блогердары наҕараадалыыр, оттон 1 мөлүйүөннээхтэр – “кыһыл көмүс кунуопканы” ылаллар. Үөһээ ааттаммыт блогтар — нуучча тылынан кэпсииллэр.
Оттон билигин ютубка сахалыы тылынан кэпсээн-ипсээн Максим Тихонов, NikolayAte, Ханнык Эрэ, djolloox uol диэн блогтаах уолаттар ылсан эрэллэр. Сонун эйгэҕэ сырдатыынан дьарыктанар Максимныын кэпсэттибит.
СПОРДУ СЫРДАТАР МАКСИМ
Максим Тихонов норуокка GelixMax (ГеликсМакс) диэн аатынан биллэр. Кини “Бөҕөс” диэн кроссфит-кулуубу тэрийэн үлэлэппитэ син быданнаата. Ол иннинэ хаартыскаҕа түһэриинэн үлүһүйэ сылдьыбыта – СИА, “Спорт Якутии” таһаарыыларга үлэлээбитэ. Онон, Максим спорду иһиттэн билэр буолан, ааспыт сылтан “Спортивный взгляд” диэн блогун ютуб киэҥ хонуутугар тарҕатар.
— Ютубка сахалыы контент баарын былырыын билбитим. Саха сириттэн Грузияҕа тиийэн кыстаабыт Виктор Кривогорницын диэн уол “Ханнык Эрэ” диэн аатынан блогтары устан угарын сэргии көрбүтүм. Кинини кытта билсэн, сүбэ-ама ылан, бэйэм ханаалбын ааспыт сыл олунньутугар аспытым. Спорду сөбүлүүбүн, тиһигин быспакка дьарыктанабын, онон чугас тиэмэбин талан, онно үлэлэһэбин.
— Ханаалга хайдах-туох видеолары угаҕын?
— Мин спортивнай тэрээһиннэри сырдатабын. Маныаха спортсмен, тириэньэр, көрөөччү санаатын ыйыталаһабын, күрэхтэһии туһунан ырытыылары оҥоробун. Билигин интэриниэккэ дьон куһаҕаны, “хайпы” көрөрүн астынар. Мин блогпар оннук суох. Видеоларбын дьоҥҥо үтүөнү, үчүгэйи кэпсээбит, тарҕаппыт киһи диэн сыаллаах устабын. Арай, киһи үөйбэтэх өттүттэн түбэлтэ тахсыбыт да буоллаҕына, ону укпаппын, куһаҕанынан болҕомтону тардыбаппын. Мин блогпар дьон көҥүл тустууну наһаа интэриэһиргээн көрөр. Холобура, ааспыт сылга Румынияҕа буолбут Европа чөмпүйэнээтин туһунан блогтарбын уопсайа 70 тыһыынчата көрбүттэр.
— Сурутааччылар интэриэстэрин тардар гына тугу сатыахха, билиэххэ нааданый?
— Интэриэһинэй контент булуохха наада. Ол аата, дьон сэҥээрэр тэрээһинин, дьонун таба тайанан устуоххун, онно сөптөөх ыйытыылары биэриэххин наада. Маны таһынан, видеоны кырасыабайдык, тупсаҕайдык устуохтааххын, табыгастаахтык таҥыахтааххын. Тыаһа-ууһа, саҥата-иҥэтэ иһиллэр, суруга-бичигэ өйдөнөр буолуохтаах. Уопсайынан, бары өттүн сатыахха наада.
— Билигин хас сурутааччыланныҥ?
— 14 600 сурутааччылаахпын. Икки нэдиэлэ анараа өттүгэр 13 тыһыынча киһи этэ. Красноярскайга ыытыллыбыт Ярыгин турнирын быһа биэриитин тута кэпсээн, дьоҥҥо сырдатан, 1,5 тыһыынча кэриҥэ киһи эбии суруттаран сөхтөрдө.
— Сураҕа, ютубтан харчылаһаллар үһү. Эн маны туһанаҕын дуо?
— Кыра да буоллар, харчы төлүүллэр. Ол эрээри, манна мачайа элбэх. Билигин мин бу өҥөнү туһанарбар диэн, хампаанньаттан пин-код почтанан айаннаан иһэр. Арассыыйа таһымнаах блогердарга кыра төлөнөр, ити туспа систиэмэлээх. Блог уһуллуҥ да, харчылаһаҕын диэн буолбатах. Кистээбэккэ эттэххэ, мин сылы быһа үлэлээбиппэр, сүүсчэ видеоны устан, блог оҥорбуппар, 20 тыһыынча солкуобайы ылыахтаахпын.
— Ханаалгын салгыы хайдах сайыннарар санаалааххын?
— Былаан бөҕөлөөхпүн. Блогпун саха тылынан эрэ буолбакка, нуучча, аангылыйа тылынан эмиэ ыытыахпын баҕарабын. Оччотугар араас таһымнаах күрэхтэһиилэри сырдатыам этэ буоллаҕа. Аны биир көҥүл тустуунан эрэ муҥурдаммакка, спорт араас көрүҥүн туһунан устуохпун баҕарабын. Тылбаасчыттаныахпын, туспа таҥааччыланыахпын, уопсайынан улахан хамаанда тэриниэхпин саныыбын.
Айтана Аммосова, «Саха сирэ» хаһыат, edersaas.ru