Сулууспаларын эбээһинэһин толоро сылдьан, суорума суолламмыт ис дьыала уорганнарын үлэһиттэрин тус бэйэм куруук киэн тутта, ону тэҥэ, аһыйа уонна уйадыйа ылынабын.
Көннөрү тиэмэ да курдук буолбакка, олохпут биир хомолтолоох көстүүтүн быһыытынан сыаналаан, маннык сотрудниктар тустарынан хаста да суруйан турабын. Биирдэ бэриллэр олоххо күөгэйэр күннэригэр сылдьан, кими эрэ быыһаары биитэр буруйу оҥорооччулар илиилэриттэн өлбүт милииссийэ-полиция үлэһиттэрэ сырдык эрэ санааны саҕаллар.
Төһө да ыраах курдугун иһин, Дагестан Өрөспүүбүлүкэтигэр бу дьыл от ыйыгар буолбут быһылаан дуораана бүтүн дойдуну аймаан тилийэ көтөн, биһиэхэ эмиэ билиннэ. Ол – полицейскайы өлөрүү дьыалата.
Субу өлөөрү да туран тостубатах, иннин биэрбэтэх, дьоруойдуу охтубут полиция үлэһитин олоҕун тиһэх мүнүүтэлэрэ уһуллубут видеотун киһи уйадыйбакка эрэ көрбөт… Итинтэн сиэттэрэн, Дагестан уонна киин иһитиннэрэр ситимнэр матырыйаалларыгар олоҕуран, бүгүҥҥү ыстатыйам киниэхэ ананар.
Ойуурга сынньана сырыттахтарына…
Бу дьыл от ыйын 10 күнэ үүнэр түүнүгэр Дагестан Избербаше диэн куоратыгар түөрт киһи ааһан иһэр массыынаны тохтотон, бэһис киһилэрин ыларга уонна кинилэри оройуон киинигэр илдьэригэр модьуйбуттар. Суоппар онуоха бөрүкүтэ суоҕу уорбалаан, кыккыраччы аккаастаммытын, багажникка күүстэринэн симпиттэр. Аара суолга суоппар тыыннаах хаалар быатыгар, багажнигы аһан, ыстанан, атахха биллэрбит.
Боевиктар буоллар, сотору ити күрэппит массыыналарын быраҕан, ойуурга, иһирдьэ, киирбиттэр. Уонна онно сынньана сылдьар дьоҥҥо кэтиллибиттэр, ол – Нурбагандовтар дьиэ кэргэттэрэ эбит.
Айылҕаҕа сынньана тахсыбыт улахан аймах дьахталлара уонна сорох эр дьоно киэһэ дьиэлээбиттэр, хоно диэн тастыҥ ини-бии Магомед уонна Абдурашид Нурбагандовтар, кинилэр оскуолаҕа үөрэнэр үс бырааттара хаалбыттар.
Силиэстийэ уорганнара өссө от ыйыгар быһаарбыттарынан, боевиктар бастакынан Абдурашиды ытан өлөрбүттэр. Эдэр киһи террористар кини 10 саастаах быраатын тэппиттэригэр көмүскэһэн, киирэн биэрээхтээбит. Онтон боевиктар Нурбагандовтар массыыналарыгар Магомеды симэн, ити сиртэн километр курдук ыраах сиргэ илдьибиттэр. Уонна кини сулууспатын дастабырыанньатыттан полиция үлэһитэ буоларын билэн баран, ытан кэбиспиттэр.
Төлөпүөҥҥэ уһулбуттар …
Полиция лейтенана Магомед Нурбагандов туохтан, хайдах өлбүтэ ааспыт ыйга биирдэ биллибит. Балаҕан ыйыгар Избербаш уонна Махачкала куораттарга силовиктар анал эпэрээссийэлэрин түмүгэр, бандгруппировка алта чилиэнин уодьуганнаабыттара. Олортон биирдэстэрин төлөпүөнүгэр полицейскай олоҕун тиһэх түгэнэ уһуллубут видеотун булбуттара.
Боевиктар төлөпүөн камератыгар Нурбагандовы тобуктатан баран, аптамаатынан тирээн туран, дастабырыанньатын көрдөрө-көрдөрө, аймахтарын уонна бииргэ үлэлиир дьонун полицияҕа сулууспаттан аккаастаналларыгар ыҥырарын модьуйаллара уһуллубут. Онуоха полицейскай ымыр да гыммакка: “Үлэлээҥ, бырааттар! Уонна тугу да эппэппин” диирэ көстөр.
Дьыала матырыйаалларын ырытыы кэмигэр Магомед Нурбагандов өлүүтэ уһуллубут видеота эмиэ баарын булбуттар. Боевиктар ону интернет-ситимҥэ таһаарбыттар эрээри, хорсун полицейскай бүтэһик эппит тылларын быспыттар, киллэрбэтэхтэр. Билигин силиэдэбэтэллэргэ видеоҕа устуу толору биэрсийэтэ баар.
Арассыыйа Дьоруойа
Полиция лейтенана Магомед Нурбагандов эр санаалаах буолуута, өлөр өлүүнү көрөн туран дьоруойдуу быһыыта ити курдук биллэн, РФ бэрэсидьиэнэ Владимир Путин балаҕан ыйын 21 күнүнээҕи Ыйааҕынан, киниэхэ Российскай Федерация Дьоруойа аата иҥэриллибитэ.
Бэрэсидьиэн “Арассыыйа Дьоруойа” Сулуһу Кремлгэ, судаарыстыбаннай наҕараадалары туттарыы кэмигэр, Магомед ийэлээх аҕатыгар туттарбыта. Манна ис дьыала миниистирэ Владимир Колокольцев эмиэ кыттыбыта.
Ити кэнниттэн утарыта олорон кэпсэтиигэ дойду бэрэсидьиэнин, миниистири таһынан, өссө Дагестан Өрөспүүбүлүкэтин бэрэсидьиэнэ баара. Өлбүт полицейскай ийэтэ эрэйдээх хара таҥаһы кэтэн, сирэйдиин-харахтыын хараара өһөн, хараҕын уутун кыатана олороохтуура. Оттон аҕата, эр киһи буоларынан, сүрдээҕин туттунан, уолунан киэн туттарын кистээбэккэ, дьоһуннук туттан олороро.
Владимир Путин кинилэргэ хорсун киһини, дьиҥнээх полицейскайы иитэн таһаарбыттарыгар махтанарын биллэрбитэ итиэннэ “өлөр өлүү тирээтэҕинэ, киһи эрэ итинник күүстээх санаалаах буолбат, кини Арассыыйа полицейскайа бирисээгэтигэр хайдах курдук бэриниилээҕин көрдөрдө” диэн эппитэ.
Дьокуускай болуоссатыгар
Дагестан полицейскайа Магомед Нурбагандов дьоруойдуу охтуута бүтүн дойду үрдүнэн биллэн, киэҥник тарҕанан, регионнарга кини сырдык кэриэһигэр акциялар ыытыллан барбыттара. Саҕалааччынан Махачкала көхтөөх ыччата буолбута.
Биһиги өрөспүүбүлүкэбит киинигэр итинник акция субуота күн, алтынньы 1 күнүгэр, Орджоникидзе болуоссатыгар ыытылынна. Тэрийээччилэр – Ис дьыала министиэристибэтэ, ис дьыала уорганнарын бэтэрээннэрин Сэбиэтэ уонна юридическай колледж. Акцияҕа бу колледж устудьуоннара, полиция үлэһиттэрэ, үөрэх тэрилтэлэриттэн дружинниктар, Дьокуускай куорат көхтөөх гражданскай позициялаах дьоно кытыннылар.
Бу күн тыл эппит дьон Магомед Нурбагандов хорсун быһыыта үүнэр көлүөнэҕэ эр санаалаах уонна идэҕэ, бирисээгэҕэ бэриниилээх буолуу чаҕылхай холобура буоларын бэлиэтээтилэр.
“Үлэлээҥ, бырааттар!” диэн тыллар акция сүрүн лозунунан буоллулар. Манна кыттыбыт хас биирдии киһиэхэ ити тыллар суруллубут стикердэрин түҥэттилэр, полицейскайдар массыыналарыгар сыһыардылар.
Бу көрүнньүк акция буолбакка, сокуоҥҥа, норуокка сулууспалыырга бирисээгэ биэрбит, кутталлаах идэни талбыт погоннаах хас биирдии үлэһит сүрэҕэр-дууһатыгар, өйүгэр-санаатыгар дириҥник дьайдар, толкуйдаттар ханнык.
Вера МАКАРОВА.
Ааптар хаартыскаҕа түһэриилэрэ.
“Саха сирэ” 2016 сыл алтынньы 6 күнэ.