Мадьыныларбыт норуоттар икки ардыларынааҕы кылаастаах маастардар буоллулар

Мас-рестлиҥҥэ аан дойду чөмпүйүөннэрэ Сергей Фролкин уонна Сергей Константинов норуоттар икки ардыларынааҕы кылаастаах  Арассыыйа успуордун маастардара буоллулар. Бу туһунан бирикээскэ РФ Успуордун миниистирэ Олег Матицын ыам ыйын 7 күнүгэр илии баттаата диэн mas-wrestling.ru саайт иһитиннэрэр.

Сергей Константинов уонна Сергей Фролкин мас-рестлинг көрүҥҥэ бастакынан норуоттар икки ардыларынааҕы кылаастаах успуорт маастардарынан буоллулар.

Маннык таһымнаах маастар буолар туһуттан мадьынылар Аан дойду уона Европа чөмпүйэнээтин кыайыахтаахтар уонна 25-тэн элбэх дойду кыттыылаах норуоттар икки ардыларынааҕы күрэхтэһиилэргэ күрэхтэспит буолуохтаахтар.

Маны таһынан, Андросов Василий, Дьячковская Татьяна, Моисеев Данил, Протопопов Юрий, Пшенников Александр уонна Федоров Иннокентий Арассыыйа успуордун маастара аатын ыллылар.

edersaas.ru