Ыарыыттан харыстанар мааскалар Дьокуускай куорат аптекаларыгар бүппүттэрин туһунан сурах бу күннэргэ тарҕаммыта.
edersaas.ru
Дьокуускай куоракка коронавирустаах ыарыһах булуллубутун туһунан сымыйа сурахха итэҕэйэн, нэһилиэнньэ маасканы элбэх устууканан атыыһалан барбыта.
Бу күннэргэ “Сахафармация” 83 тыһыынчаттан тахса мэдиссиинискэй маасканы атыыга эбии таһаарда.
Гириип вирустара киһиттэн киһиэхэ салгынынан, ыалдьыбыт дьон ытыртаҕына эбэтэр сөтөлүннэҕинэ, дьоҕус хааппылаларынан бэриллэллэр. Бу хааппылалар салгынынан тыынар уорганнар салыҥнаах бүрүөлэригэр киириэхтэрин сөп. Онон, ыалдьар киһи баар кэмигэр харыстанар маасканы кэтэр булгуччулаах. Оттон ыарыыттан харыстанар уонна инфекцияны тарҕаппат туһугар маасканы туһаныы туһунан төһө билэбитий?
—Биирдэ эрэ туттуллар мэдиссиинискэй мааскалаах буоллаххына, доруобай киһи организмыгар респираторнай хааппылалар киирбэттэр.
-Ыарыһах киһини көрөр-истэр кэмҥитигэр маасканы кэтиҥ.
-Бэйэҕэр респираторнай ыарыылар сибикилэрэ баар буоллахтарына уонна бырааска көрдөрө бараргытыгар маасканы эрдэттэн кэтиҥ.
-Гириип өрө турбут кэмигэр элбэх дьон тоҕуоруһар сиригэр мааскалаах сылдьыҥ.
-Маасканы биирдэ эрэ туһаныллар, иккистээн-үһүстээн кэтии көдьүүһэ суох.
-Мааскаҕытын 3 чаас буола-буола уларытыҥ.
-Сиигирбит буоллаҕына, эмиэ тута уларытыҥ.
-Мааскаҕытын туттан баран быраҕыҥ уонна илиигитин суунуҥ.
Мэдиссиинискэй маасканы сөпкө туһанар буоллахха, мааска — ыарыыны сэрэтэргэ көдьүүстээх уонна эрэллээх ньыма.
Надежда ЕГОРОВА, “Саха сирэ”, edersaas.ru