Маалыкайдар былырыыҥҥы быһаарыныылара олоххо киирдэ

Ааптар: 
Бөлөххө киир:

Олохтоох салайыныы көҕүлээһинин өйүүр быраагыраама чэрчитинэн бу күннэргэ Ньурба улууһун Маалыкайын олохтоохторо нэһилиэккэ киириигэ аан аартыгын бэлиэтин үөрүүлээх быһыыга-майгыга арыйдылар.

edersaas.ru

Маалыкай  — улуус биир бөдөҥ нэһилиэгэ. Манна 2007 киһи олорор. Нэһилиэк баһылыга Леонид Ушканов бэлиэтииринэн, быйыл маалыкайдар  уопсай мунньаҕынан икки бөдөҥ бырайыагы олоххо киллэрэргэ быһаарбыттар.

— Былырыын алтынньыга нэһилиэк олохтоохторун кытта сүбэлэһэн баран, икки бырайыагы — спорт былаһааккатын уонна нэһилиэк аан аартыгын бэлиэтин тутарга быһаарыммыппыт. Биирдии «буруоттан» (ыалтан) 500 солк. хомуйбуппут. Онно эбии киин куоракка Дьокуускайга олорор кыахтаах урбаанньыттарбыт спонсордаан, икки бырайыакпытыгар холбоон 300 тыһ. солк хомуйбуппут. Аукциоҥҥа «Трамплин» (сал. Андрей Алексеев) уонна «Ректайм»  (сал. Киприянов) хааччахтаммыт эппиэтинэстээх тэрилтэлэрэ кыайан, биирдэрэ — спорт былаһааккатын, иккиһэ — аан аартык бэлиэтин оҥорбуттара. Тутуу биригэдээлэрэ от ыйыгар биллэриллибит аукциоҥҥа бастаат, тута киин куораттан кэлэн, атырдьах ыйын бүтүүтэ үлэлэрин түмүктээбиттэрэ. Биһиги эбийиэк быстах үлэтин ситэрэн биэрэн баран, сэтинньи 7 күнүгэр нэһилиэк аан аартыгын бэлиэтин үөрүүлээх быһыыга-майгыга арыйдыбыт, — диэн кэпсиир Леонид Ушканов.

Олохтоох салайыныы көҕүлээһинин өйүүр быраагырааманы олохтоохтор олус сэргээтилэр. Кырдьык да, нэһилиэктэр ис-тас көрүҥнэрин тупсарар үлэ бу биир көрүҥэ өрөспүүблүкэ социальнай-экэнэмиичэскэй сайдыытыгар кэскиллээх олугу уурар.

Елена ПОТОЦКАЯ, «Саха сирэ» хаһыат, edersaas.ru

Хаартыскаҕа олохтоох дьаһалта исписэлииһэ Элиза Стручкова түһэриитэ.

+1
0
+1
0
+1
0
+1
0
+1
0
+1
0
+1
0