Өрөспүүбүлүкэ лиссиэйигэр икки нэдиэлэ устата саха биллиилээх суруйааччыларыгар аналлаах тэрээһиннэр өрө көтөҕүллүүлээхтик, тэрээһиннээхтик, сэргэхтик ыытылыннылар. Василий Васильевич Яковлев төрөөбүтэ 85 сылыгар аналлаах тэрээһин туһунан лиссиэй саха тылыгар, литературатыгар учуутала Саргылаана Игнатьева иһитиннэрдэ.
—Тэрээһиҥҥэ Василий Васильевич кэргэнэ, Оонньуулах Уйбаан сиэнэ Клара Трифоновна Яковлева оҕолорун кытта, Чурапчыттан Павел Петрович Федоров-Сомоҕо, ХИФУ преподавателлэрэ Прасковья Васильевна Сивцева, Егор Гаврильевич Винокуров, суруйааччы Василий Назарович Егоров-Тумарча, бииргэ алтыспыт доҕоро Василий Романович Дарбасов, Дьокуускайтан Михаил Егорович Друзьянов, Александра Егоровна Колесова, «Тойон Кыыл» киинэ кылаабынай режиссера Эдуард Новиков, уо.д.а. ыалдьыттаатылар. Маныаха тэрээһиммит анаабыт курдук Клара Трифоновна төрөөбүт күнүгэр сөп түбэһэн биэрбитэ, үөрүүбүтүн уонна долгуйуубутун өссө үрдэппитэ.
Мустубут ыалдьыттар, лиссиэй преподавателлэрэ оҕолорго Василий Яковлев олоҕун, айар үлэтин туһунан сырдаттылар, айымньыларын туһунан санааларын үллэһиннилэр. Салгыы күргүөмүнэн ааҕыы бырайыагар уонча сыл тиһиктээхтик үлэлэһэр өрөспүүбүлүкэ лиссиэйэ быйылгы да тэрээһиҥҥэ көхтөөхтүк кытынна. 7-с кылаас үөрэнээччилэрэ «Кытта кырдьыбыт тэҥкэ тиит» айымньыны ааҕа сылдьалларын туһунан киэн туттан туран сырдаттылар, оҕолор санааларын сайа эттилэр. Кэпсэтиигэ Василий Яковлев «Кытта кырдьыбыт тэҥкэ тиит» кэпсээнин уонна ол айымньытыгар олоҕуран уһуллубут «Тойон кыыл» киинэ тула сэргэх сэһэргэһии таҕыста.
Тэрээһиҥҥэ «Ааҕар Саха сирэ» диэн түмсүү тэрилиннэ, үс киһиттэн састааптаах бырабылыанньа талылынна. Бырабылыанньаҕа лиссиэй дириэктэрэ Иван Шамаев, «Чолбон» сурунаал сүрүн эрэдээктэрэ Данил Макеев, «Күрүлгэн» уус-уран альманах сүрүн эрэдээктэрэ Афанасий Гуринов-Арчылан киирдилэр. Дьону-сэргэни, ыччаты ааҕыыга угуйар, түмэр сыаллаах-соруктаах тэриллибит түмсүү үлэтэ далааһыннаах буоларыгар эрэлбитин биллэрдибит, ситиһиилэри баҕардыбыт.
