Биэтэс Билээхэп: Лиип мучумаана

Бөлөххө киир:

Киһи сырыттаҕына сылдьар. Көр, бэҕэһээ ыт буола сыстым ээ. Эмээхсиним араас араахыматын көрдөрөрүн арыаллааччы буолан, балыыһаҕа барыстым. Дьэ, тас таҥаспытын устан, атахпытыгар били “баахылабытын” кэтэн, лиипкэ киирдибит. Ол биһигинньик дьон, хайаан кирилиэһи дабайыахпыт баарай. Эдэр дьон баҕас, үһүс-төрдүс этээскэ сүүрэн сыбыгырайан тахсыа эбиттэр да, дьэ суох, бары лиипкэ симилиннилэр. Оо, мин кинилэр саастарыгар сылдьан… Чэ бэйи, эмиэ халыйаары гынным.

Дьэ, айаннатан истибит. Этээс аайы тохтоон, киһини ылар, сорохтор тахсаллар. Үһүс этээскэ биир сааһырбыт дьахтар кэлээскилээх эмээхсини киллэрээри, сабыллан эрэр ааны баттаабытыгар, лииппит олох даҕаны “лип” сабыллан баран, турунан кэбистэ. Иэдээн, лиипкэ хаайтардыбыт…

Дьэ, айманыы буолла. Бары да бырааска эрдэ суруйтарбыт буолан, уочараппытын куоттарар “дьоллоннубут”. Кунуопкалары баттыы сатаатыбыт да, үлэлээбэт. Хата, биир дьахтар өй булан, чуораан ойуулаах кунуопканы баттаабытыгар, диспетчер саҥата умайыктана түстэ. “Биригээдэни ыыттым, уонча мүнүүтэ кэтэһиҥ” диэн буолла.

Ол икки ардыгар лииппит хайдах эрэ куһаҕаннык хамсаата уонна уот барда. Атырдьах ыйынааҕы ытыс таһынар хараҥа диэн кэлиэ дуо, харах тэстэр им-балайа буолла. Оҕо куттанан ытаата. Дьахтар сарылаата. Оннооҕор миигинниин биэс хааһах диэбиккэ дылы, хараҥаттан, кыараҕастан тыыным хаайтаран, бөтүөхтээн киирэн бардым. Эмээхсиним муҥнаах: “Оҕонньор, хайдах буоллуҥ?” – дии-дии айманна. Ким эрэ: “Человеку плохо!” – диэн хаһыытаата.

Дьэ, ол аймана турдахпытына, таҥара уотун курдук, “хараҥаҕа тыкпыт сырдык” сандаарыс гынна. Биир киһи банаардаах төлөпүөнүн холбообут эбит. Бу аныгы үйэ тэрилэ абыраатаҕын көр!. Сырдыгы, дьон сирэйин көрөн, арыычча бэттэх кэллим. Биллэн турар, дабылыанньам өрө сүүрэн таҕыста. Хата, бэрдин бэрт, эмпин укта сылдьааччыбын. Эмээхсиним ону хостоон биэрбитин, ыйыстан баран, сүһүөҕүм уйбакка, сиргэ олорунан кэбистим.

Бары кимиэхэ эрэ эрийэллэр, ыксыыллар, ааны тоҥсуйаллар, оҕо ытыыр, били дьахтар төлөпүөнүгэр хаһыытыыр – онто да суох убаҕас мэйиилээх киһи өйө көтүөх айылаах. Ол мучумаан быыһыгар биригээдэбит кэллэ быһыылаах, тимир тыаһаата, лииппит үрдүгэр дьон кэпсэттилэр. Кыычыгыраан-хаачыгыраан, аҥар аана аһылынна, “Выходим!” диэн хамаанда иһиллээтин, били ыччаттарбыт бастакынан үтүрүһэ түстүлэр. Олорор киһини турарыгар көмөлөһөр аат диэн суох, хата, атахпын быһа үктээн аастылар. Дьахталлар этиһэн умайыктаннылар, кыбылла-кыбылла тахсыы буолла. Бүтэһигэр биһиги, мөлтөх дьон, хааллыбыт. Оҕолоох дьахтар биһиги иннибитинэ эрэ таҕыста. Дьэ, буолар да эбит!.

Бу аныгы үйэҕэ ыччаты ыксаллаах быһыыга быыһанарга үөрэтэллэрэ эбитэ дуу, суох дуу? Оо, былыр биһиги противогаз кэппитинэн сыыллан, аптамааты ыһан-хомуйан, үөрэх бөҕөтүн аастахпыт. Оҕону, кырдьаҕаһы бастакынан таһаарыҥ диэн үөрэтэллэрэ ээ… Билигин арай, туох эрэ алдьархай буоллун? Оо, арах, арах даа…

+1
0
+1
0
+1
0
+1
0
+1
0
+1
0
+1
0