Сотору Саха сирин киин куоратыгар Дьокуускайга норуоттар икки ардыларынааҕы киинэ бэстибээлэ ыытыллыаҕа.
edersaas.ru
Бу суолталаах тэрээһин туһунан тэрийэр бөлөх чилиэнэ Сардаана Сыромятникова маннык сырдатар:
— Уопсайа 18 дойдуттан 55 киинэ киирдэ. 45 тас дойдуттан уонна Арассыыйаттан дьүүллүүр сүбэ, ыалдьыттар кэлээри тэринэ сылдьаллар. Кулун тутар 18-22 күннэригэр күн аайы бу киинэлэри буор босхо киинэ тыйаатырдарыгар, Саха тыйаатырыгар көрүөххэ сөп.
Киинэ бэстибээлэ саха киинэлэрин сайыннарар, айар-тутар дьонун үөрэтэр олус дириҥ суолталаах тэрээһин. Норуоттар икки ардыларынааҕы таһымнаах араас дойдулары кытыннаран, уопут атастаһан, бэйэбит киинэлэрбитин таһаарарга үлэлэһэр бэстибээл буолар. Биһиги, сахалар, норуоппут култууратын аан дойдуга киинэ нөңүө көрдөрөр кыахпытын муҥутуурдуу туһаныахпытын наада. Бу — бэстибээл сүрүн соруга. Киинэ эйгэтэ аан дойдуга сайдан, баһылаан турар бириэмэтин таба тайаныы — кэм ирдэбилэ.
Киһи киинэ нөҥүө олоҕу-дьаһаҕы хайдах баарынан, норуот тыынын, өйүн-санаатын, олоххо сыһыанын, култууратын тиэрдэр күүс дии саныыбын. Киһи мэйиитэ дьикти. Баар иһитиннэриини, сонуну мээнэ иһигэр киллэрбэт, аныгы киһи ордук илэ көрбүтүн-истибитин ылынар.
Саха сиригэр туризм сайдыытыгар киинэ эмиэ сыһыаннаах. “Эверест” киинэ төһөлөөх элбэх киһини хайаларга угуйбута буолуой? Саха сирин тымныыта — экстремальнай туризм. Тоҕо биһиги дойдубут олус тымныыный, сиртэн хостонор ханнык да дойдуттан элбэх баайдааҕый? Тоҕо биһиги норуоппут бу сиргэ сөбүлээн олохсуйан, мындыр өйүнэн тыыннаах хаалан, төрөөн-ууһаан олороруй? Ама, бу атын омукка интириэһинэйэ суох дуо?
Биһиги күүспүт — сирбит-уоппут, дойдубут, өбүгэбититтэн саҕыллар дириҥ ситиммит. Ол ону киинэ нөҥүө сырдатар, ситимниир, үйэтитэр кэм кэлбитин мүччү тутарбыт сатаммат.
Дьэ, бу маннык санаалаах лиидэр кыргыттар санаабыт санааларын, иитиэхтии сылдьыбыт толкуйдарын олоххо киллэрэн эрэллэр. Бэлиэтээн эттэххэ, олунньу 29 күнүгэр СӨ Дьахталлар уопсастыбаннай тэрилтэлэрин сойуустарын иһинэн үлэлиир Лиидэр кыргыттар форумнара буолуоҕа. Онно бу Сардаана Сыромятникова кэпсээбит киинэ бэстибээлин туһунан сиһилии кэпсэтиэхтэрэ, ырытыахтара.
Елена ПОТОЦКАЯ, «Саха сирэ» хаһыат, edersaas.ru