Сунтаарга, Н.Н.Тарскай аатынан өрөспүүбүлүкэ көҥүл тустууга чөмпүйэнээтигэр тиийэ сылдьан быыс булан, кикбоксиҥҥа аан дойду алта төгүллээх чөмпүйүөнэ, Россия чөмпүйэнээтин хас да төгүллээх кыайыылааҕа, Европа икки төгүллээх чөмпүйүөнэ, боксаҕа аан дойду чөмпүйэнээтин призера, КИТЭК лигатын 4 төгүллээх кыайыылааҕа, спорт үтүөлээх маастара Лидия Андреева аатынан мусуойга сырыттыбыт.
Сарсыныгар, кулун тутар 18 күнүгэр Лидия Андреева биһиги кэккэбититтэн хомолтолоохтук өлөн туораабыта биир сыла туолбута. Онон кэриэстэбил күн иннинэ биһиги биллиилээх спортсменкаҕа сүгүрүйүү бэлиэтин оҥорбуппут.
Мусуойга Лидия спорка ситиспит кубоктара, мэтээллэрэ, грамоталара, хаартысканан альбомнара, наҕараадалара көрдөрүүгэ туруоруллубуттар. Аан дойду каартатыгар кини күрэхтэспит уонна кыайыыны ситиспит дойдулара, куораттара анал былааҕынан бэлиэтэммитэ болҕомтону тардар. Мусуой хоско тэлэбиисэргэ Лидия киирсиилэрин көрүөххэ сөп. Мусуойу биһиэхэ Лидия аҕата Егор Ефимович хас биирдии экспонаты кэрийэ сылдьан кэпсээбитэ, билиһиннэрбитэ. Лидия ийэтин Аграфена Степановнаны кытта көрүстүбүт, анал сурунаалга бэйэбит санаабытын суруйдубут. Мусуой өссө кэҥииригэр, экспонатынан байа турарыгар баҕардыбыт. Төрөөбүт дойдутун, өрөспүүбүлүкэтин, улууһун чиэһин ситиһиилээхтик көмүскээбит биллиилээх спортсменка Лидия Андреева аатын үйэтитии салҕаныахтаах. Маныаха Лидияны кытта сыһыаннаах дьон матырыйаалларынан көмөлөһөргүтүгэр баҕарабыт итиэннэ Сунтаарга кэллэххитинэ бу, Октябрьскай уулуссатын 66 нүөмэрдээх дьиэтигэр баар мусуойу быһа ааспаккытыгар сүбэлиибит.
Лидия Андреева мөссүөнэ биһиги сүрэхпитигэр өрүү тыыннаах буолуоҕа.
Петр ПАВЛОВ, «Саха сирэ”. www.edersaas.ru
Ааптар хаартыскаҕа түһэриилэрэ.