Саха сирин 13 куоратыгар уонна үс сэлиэнньэтигэр от ыйын 1 күнүттэн сэтинньи 30 күнүгэр диэри «Leto Yakutia» диэн аныгы култуура бэстибээлэ ыытыллыаҕа. Бэстибээл чэрчитинэн хас биирдии куорат уонна сэлиэнньэ уратытын бэлиэтиир гына уулуссалары киэргэтиэхтэрэ.
Бэстибээл Дьокуускайга, Нерюнгрига, Мииринэйгэ, Ленскэйгэ, Алдаҥҥа, Өлүөхүмэҕэ, Удачнайга, Бүлүүгэ, Покровскайга, Ньурбаҕа, Орто Халымаҕа, Дьааҥыга, Чурапчыга, Аммаҕа уонна Бэрдьигэстээххэ буолуоҕа. Хас биирдии пууҥҥа ураты бырагыраамалаах бэстибээл ыытыллыаҕа. Холобура, Нерюнгрига баар эргэ тиэхиньикэ пааркатын эбийиэктэрин уруһуйдуохтара, саҥардыахтара. Маныаха хас биирдии талыллыбыт сиртэн төрүттээх айар куттаах ыччаты эппиэттээҕинэн анаатылар.
Бэстибээл тэрийээччилэриттэн биирдэстэрэ, эдэр худуоһунньук Кыыдаана Игнатьева: “Кырдьык, «Leto Yakutia» бэстибээл бырагыраамата олус киэҥ уонна интэриэһинэй буолуоҕа. Араас инсталляциялар, мураллар оҥоһуллуохтара. Маны таһынан, худуоһунньуктар нэһилиэнньэни кытта көрсөн маастар-кылаастары ыытыахтара, кэпсэтиилэргэ кыттыахтара. Билиҥҥи кэмҥэ үлэ барылларын оҥоруу, ырытыы бара турар. Олохтоохтор куоластааһыннарын түмүгүнэн эскииһи талыахпыт. Холобура, Чурапчы олохтоохторо норуот суруйааччыта Даланы боотур уобараһыгар уруһуйдаабыппын таллахтарына, мурал дьиэ истиэнэтин киэргэтиэҕэ”, — диэн кэпсиир.
Тэрийээччилэр сүрүн сыаллара – стрит-арт, инсталляция, арт-эбийиэк нөҥүө олохтоохтор тулалыыр эйгэлэрин уларытыы, саҥардыы, төрөөбүт дойдуга тапталы күүһүрдүү. Бэстибээл тэрийээччилэр 6 мөлүйүөн солкуобайдаах РФ бэрэсидьиэнин, 100 тыһыынча солкуобайдаах СӨ Ил Дарханын граннарын сүүйбүттэригэр уонна муниципальнай тэриллиилэр, олохтоох спонсордар өйөөһүннэригэр олоҕуран ыытыллар.
Айтана АММОСОВА, «Саха сирэ» хаһыат, edersaas.ru