Ленскэй оройуонун Орто Наахара уонна Соҕурууҥҥу Ньүүйэ сэлиэнньэлэрин олохтоохторо үүт туттаран дохуоттаналларыгар анаан, үүтү тутар саҥа пууннар туруоруллан эрэллэр.
edersaas.ru
Аныгы технологиянан сэбилэммит үүт тутар саҥа пууннары Ленскэйгэ «Арман» ХЭУо оҥордо. Инньэ гынан, 1,5 мөл. солк. бүддьүөт үбэ кэмчилэннэ. Оройуон баһылыга Жумарт Абильманов «Батамайдааҕы» хаһаайыстыба салайааччыта Николай Ефимовы кытары саҥа пууннары райсэбиэт дьокутааттарыгар көрдөрдүлэр.
– Үүт тутар дьоҕус пууннары сакаастыырбытын биллэрбиппитигэр саамай удамыр, 4,9 мөл. солк., сыананы Москва хампаанньата эппитэ, онуоха 1,5 мөл солк аҥардас аҕалыытыгар барарын билэн баран, биһиги олохтоох тэрилтэҕэ оҥортордубут. Манна сэндвич-панелы оҥорор собуот баар итиэннэ «Арман» харааһы, дьоҕус тутуулары оҥоро үөрүйэх буолан, бэрт хаачыстыбалаахтык оҥордо. Сакаастаабыт астыыр тэрилбит ыам ыйын бүтүүтүгэр кэлиэхтээх, ону таһаараммыт икки нэһилиэккэ туруоруохпут, – диэтэ Жумарт Абильманов.
Николай Ефимов саҥа пуун соҕурууҥҥу бырайыак быһыытынан буолбакка, олохтоох усулуобуйаҕа сөп түбэһиннэрэн оҥоһуллубута быдан ордугун бэлиэтээтэ. Ол курдук, эркинин кэтитэ 100 мм буолбута кыһын сылааһы мэктиэлиир (бырайыакка 70 мм эбит), оттон дьоҕус ааны таһынан, үөһэттэн тардыллар икки өттүнэн тэлэллэн аһыллар ааннааҕа тэрили киллэрэн таҥарга табыгастаах эбит. Бу икки саҥа пуун астыыр тэриллэрин кытары сыаналара холбоон, 3 мөл солк эбит, ону оройуон бэйэтин бүддьүөтүттэн уйуммут.
Биһиги эрдэ суруйан турарбыт курдук, оройуон дьаһалтата бүддьүөтүттэн үп көрөн, үүт харчытын үрдэтэн, олохтоохтор сүөһүнү иитэргэ быдан интэриэстэннилэр. Инньэ гынан, Мухтуйа сиригэр тыа хаһаайыстыбата сайдар кирбиигэ киирдэ. Аны үүтү тутар уонна астыыр пууннары саҥардыы хамсааһына саҕаланна. Бэтинчэҕэ уонна Чамчаҕа баар астыыр пууннар олус эргэрдилэр, онон кэлэр өттүгэр хас да нэһилиэккэ саҥа пууну тутар ирдэнэр диэн оройуон дьаһалтата иһитиннэрэр.
Раиса Сибирякова, «Саха сирэ» хаһыат, edersaas.ru