Ааспыт нэдиэлэҕэ “Тыа хаһаайыстыбатын иһитиннэрэр-сүбэлиир киинэ” судаарыстыбаннай хаһыанай тэрилтэ салайааччыта Семен Плотников уонна Тыа хаһаайыстыбатын министиэристибэтин исписэлиистэрэ Ленскэй оройуонугар үлэлээтилэр.
Оробуочай бөлөх оройуон дьаһалтатын бэрэстэбиитэллэрин итиэннэ тыа хаһаайыстыбатын улуустааҕы управлениетын үлэһиттэрин кытары сүөһүнү-сылгыны иитиигэ идэтийэр Ньүүйэ, Бэчинчэ, Сылгы Күөлэ уонна Орто Наахара нэһилиэктэригэр сылдьан, агропромышленнай комплекс сүрүн эбийиэктэрин көрдүлэр-иһиттилэр, кыстык хаамыытын билистилэр. Түмүккэ оройуон дьаһалтатын аактабай саалатыгар тыа хаһаайыстыбатын табаарын оҥорооччулары кытары көрсөн, быйылгы 2020 сылга көрүллэр субсидиялар ырычаахтарын быһааран биэрдилэр. Оройуон дьаһалтатын итиэннэ тыа хаһаайыстыбатын улуустааҕы управлениетын кытары ыытыллыбыт холбоһуктаах сүбэ мунньахха Саха сирин арҕааҥҥы түбэтигэр тыа хаһаайыстыбатын сайыннарыы кэнсиэпсийэтин ырытыстылар.
Раиса Сибирякова, «Саха сирэ» хаһыат, edersaas.ru