Ленскэйгэ итинник ааттаах аахсыйаҕа урбаанньыттар турунан кытталлар. Бу туһунан Ленскэй куорат дьаһалтатын пресс-сулууспата суруйар.
Коронавирус дьаҥын утарар, бохсор хамсааһыҥҥа оройуон олохтоохторо күүскэ туруналлар. Үтүө санааланыы чэрчитинэн тэриллибит аахсыйаҕа урбаанньыттар көмөлөспүттэр. Ол курдук, «Самур» маҕаһыын тиһиктэрин салайар урбаанньыт Нурахмедов К.Б. аһы-үөлү сэргэ, волонтердарга массыына биэрэн улахан өйөбүлү, көмөнү оҥорбут. Пресс-сулууспа бу салайааччыны ,өссө маны таһынан, 20 набору бэйэтин үлэһиттэригэр биэрэн көмөлөспүтүн бэлиэтиир. Аахсыйаҕа маны сэргэ, «Гурмания» ХЭУо, «Европа» салон-парикмахерскай, итиэннэ куорат биир олохтооҕо Примак Наталья кыттыбыттар. Урбаанньыт Ширинов В.С. («Блеск» маҕаһыын) ас-үөл наборун хас бээтинсэ ахсын бу маҕаһыын оройуонугар бырапыыскалаах, 65 сааһыттан үөһээ саастаахтарга биэрэн көмөлөһөрө бэлиэтэнэр.
Оттон волонтердар аһы-үөлү, наадалаах малы-салы аҕам саастаахтарга, доруобуйаларынан хааччахтаах дьоҥҥо тиэрдиигэ турунан туран көмөлөһөллөр. Кинилэр ас-үөл наборун ааннарын таһыгар аҕалан ууран биэрэллэрин туһунан «Якутия 24» ханаалга кэпсээтилэр. Билиҥҥитэ 100 набор тиэрдиллибит. Өссө да кыһалҕалаахтарга илдьэн биэрэр сорук турар.
Ленскэйдэр күүскэ туруммуттар. Үтүө санаалаах дьон кыһалҕалааахтарга көмөлөһөллөрүттэн, өйөбүл буолалларыттан киһи долгуйа үөрэр. Үтүө санаа ханнык да ыараханы, хараҥаны кыайар аналлаах.