Быйыл Ленскэйгэ «Култуура» национальнай бырайыак чэрчитинэн Норуот айымньытын дьиэтигэр киинэ саалата арыллыаҕа. Бу туһунан СӨ култуураҕа уонна духуобунай сайдыыга министиэристибэтэ иһитиннэрэр.
Ленскэйдэр «Фонд кино» федеральнай куонкуруска кыттыбыттарын түмүгэр киинэ саалата арылларыгар үп көрүллүбүт.
«Биһиги куонкуруска сыллата кыттабыт, быйыл түөрт сайаапканы ыыппыппыт. 2020 сылга Киинэ пуондатын 70 %-на сарбыллыбыта, онон 200 киинэ тыйаатыра арыллыахтааҕыттан 60-а эрэ олоххо киириэҕэ. 1 млрд солкуобай көрүллүөхтээҕиттэн 300 мөлүйүөн солкуобай хаалбыт. Тэрийээччилэр 10 тыһыынчаттан элбэх ахсааннаах нэһилиэнньэлээх пууннары өйөөбүттэрин түмүгэр Ленскэй хабылынна. Саҥа саала 50 миэстэлээх, 5 мөлүйүөн солкуобайдаах саҥа тэриллээх буолуоҕа«, — диэн Өрөспүүбүлүкэтээҕи киинэ ситимин дириэктэрэ Петр Чиряев иһитиннэрэр.
Кини этэринэн, Ленскэй куоракка биир киинэ тыйаатыра баар эбит. Ол эрээри, элбэх киинэни көрдөрбөттөрүттэн уонна үгүс тиэхэньиичэскэй кыһалҕалар баалларыттан олохтоохтор астымматтар эбит.
Өрөспүүбүлүкэтээҕи киинэ ситимэ үлэлиэҕиттэн 16 киинэ саала арыллыбыт. 2019 сылга «Култуура» национальнай бырайыак уонна «Фонд кино» куонкурус чэрчилэринэн Орто Халымаҕа, Бүлүүгэ, Бэрдьигэстээххэ, Баатаҕайга уонна Өлөөҥҥө киинэ саалалара арыллыбыттара. Оттон 2016 сылтан Үөһээ Бүлүүгэ, Аммаҕа, Уус Алдаҥҥа, Чурапчыга, Жатайга уонна Дьокуускайга баар Норуоттар доҕордоһууларын дьиэтигэр киинэ саалалара үлэҕэ киирбиттэрэ.
edersaas.ru
Хаартыска — sarkvc.ru саайтан.