Ленскэйгэ оҕолор былаһааккаларын былдьаатылар

Бөлөххө киир:

Ленскэй куоратын «Разведчик» микро-оройуонугар баар «Дружба» проспегын 27-с, 31-с №-дээх аадырыска турбут оҕолор оонньуур былаһааккаларын атырдьах ыйын саҥатыгар көтүрэн, тиэйэн илдьэ барбыттар. Бу туһунан Ленскэй оройуонун дьаһалтатын пресс-сулууспата иһитиннэрэр.

Олохтоохтор ыйытыыларыгар «былаһаакка докумуона суох» диэн эппиэт кэлбит. Кэлин билбиттэрэ, былаһаакка Победа уул. 69-с Г №-дээх аадырыска тиийэн дьэндэйбит. «Разведчик» микро-оройуоҥҥа оонньуур оҕо элбэх. Билигин былаһаакка суох буолуоҕуттан кураанахсыйан хаалбыт тэлгэһэҕэ оҕолор оонньуур сирдэрэ суох буолбут. Урукку өттүгэр былаһаакканы төрөппүттэр өрүү субуотунньук тэрийэн көрө-истэ сылдьыбыттар.

Былаһаакканы көһөрүүгэ көҥүлү куорат дьаһалтата биэрбит. Куорат балаансатыгар докумуона суох былаһаакка туруо суохтаах диэн иһитиннэрбиттэр. «Победа уул. 69-с Г №-дээх дьиэтин олохтоохторо былаһаакканы бэйэлэрин эппиэтинэстэригэр ыларга сөбүлэҥ биэрбиттэр, ол иһин көһөрүлүннэ» диэн эппиэт кэлбит. Маннык эппиэт «Разведчик» олохтоохторун соһуппут.

Ленскэй оройуонун баайга-дуолга сыһыаннаһыы кэмитиэтигэр быһаарбыттарынан, бу былаһаакка оройуон бас билиитигэр сылдьар эбит. Оччотугар тоҕо былаһаакка көрүүтүн-истиитин «Разведчик» олохтоохторугар биэрбэккэ, сэрэппэккэ эрэ былдьаатылар?

Ульяна Захарова, edersaas.ru

+1
0
+1
0
+1
0
+1
0
+1
0
+1
0
+1
0