Ленскэй куоракка баар 8 №-дээх ураты эрэсиимнээх холуонньа сабылынна. Манна ыар уонна ураты ыар буруйдары хаһыс эмит төгүлүн оҥорбут дьон буруйун боруостаан олорбута. Бу туһунан, бэл диэтэр, «Россия 1» федеральнай ханаал «Вести. Дежурная часть» биэриитигэр көрдөрдө (видеота иһирдьэ баар).
Бу холуонньа 1938 сыллаахха 3 №-дээх үлэнэн көннөрөр холуонньа быһыытынан аһыллыбыт. Өрдөөҕү хаайыы мас дьиэлэрэ хаарбах туруктанан, төһө да өрөмүөн ыытыллыбытын иһин чөлүгэр түспэттэринэн, сабарга диэн быһаарыы тахсыбыт. Уонна бу холуонньа хаайыылаахтарын Хаҥалас улууһун Үөһээ Бэстээҕэр баар 3 №-дээх уопсай эрэсиимнээх холуонньаҕа ураты эрэсиимнээх изолированнай учаастагы аһан көһөрөргө диэн быһаарбыттар.
РФ Накаастабылы толорор федеральнай сулууспатын Саха сиринээҕи управлениетын пресс-сулууспата иһитиннэрбитинэн, ураты эрэсиимнээх холуонньа хаайыылаахтарын Үөһээ Бэстээх холуонньатыгар көһөрүү түмүктэммит. Манна управление хонбуойдааһыҥҥа отделын сотрудниктара уонна «Белый медведь» спенцназ этэрээтин байыастара кытыннылар. Туох да быһылаан тахсыбата, барыта этэҥҥэ ааста.
Маны таһынан, бу көһөрүү хайдах барарын «Россия 24» федеральнай телеханаал суруналыыстара анаан-минээн кэлэн уһулан барбыттара. Тугу устубуттарын «Вести. Дежурная часть» биэриигэ көрүөххүтүн сөп.
Биһиги корр., «Саха сирэ» хаһыат, edersaas.ru
Хаартыскалар: РФ Накаастабылы толорор федеральнай сулууспатын Саха сиринээҕи управлениетын пресс-сулууспата.
https://www.youtube.com/watch?v=Zpkt6mDfNy4