Бүгүн — В.И. Ленин төрөөбүтэ 147 сыла. Сэбиэскэй кэм оҕолоро улуу эһэбитинэн ааттыыбыт. Таатта Уолбатыгар бу күнү үөрүүлээх быһыыга-майгыга бэлиэтээтилэр.
Елена ПОТОЦКАЯ, «Саха сирэ» хаһыат, https://edersaas.ru
Бүгүн эрэ буолуо дуо, сыл аайы бу бэлиэ күн уолбаларга бырааһынньык курдук бэлиэтэнэр эбит. Төрүөтэ — оскуола 1924 сылтан күн бүгүҥҥэ диэри В.И. Ленин аатын сүгэр! Оччолорго улуу сирдьит өлбүтүн истэн, олохтоохтор миитин тэрийбиттэр уонна оскуолаҕа Ленин аатын иҥэрэргэ туруорсубуттар. Биир дойдулаахтарын туруорсууларын, учуутал Семен Кочкин Москваҕа тиийэ сүүрэн-көтөн, оскуолаҕа В.И. Ленин аата иҥэриллэрин ситиспит. Сэбиэскэй кэмҥэ, бу билиҥҥи курдук, ким да аатын оскуолаҕа иҥэрбэттэр этэ. Буолаары буолан, тыа оскуолатыгар Ленин аатын. Ол да иһин буолуо, уолбалар, «былаас уларыйда» диэн санааларын уларыппатахтар. Онон күн бүгүҥҥэ диэри 70 үөрэнээччилээх В.И. Ленин аатынан Уолба орто оскуолата горн уонна барабаан ньиргиэринэн, пионер аалай хаалтыһын баанан араас үөрүүлээх тэрээһиннэрин саҕалыыр уонна түмүктүүр.
Урукку оскуола мусуой буолан турбут. Онтон кыраайы үөрэтэр мусуой оҥорбуттар. Бу мусуойга В.И. Ленин кэргэнин Надежда Крупскаяны кытта оҕолор суруйса сылдьыбыт суруктара баара эбитэ үһү. 2011 с. оскуола баһаарга былдьаммыт. Билигин оҕолор 1972 с. тутуллубут оскуолаҕа үөрэнэллэр. Үөрэнээччилэр саамай улахан баҕалара, оттон төрөппүттэр өрүү толорор былаас отчуотун аайы туруорсар туруорсуулара — саҥа оскуола тутуута.
— Бүгүн В.И Ленин төрөөбүт күнүнэн сибээстээн, Уолбаттан төрүттээх аатырбыт биир дойдулаахпыт Семен Неустроев төрөөбүтэ 100 сылыгар аналлаах кыраайы үөрэтиигэ туһуламмыт кэмпириэнсийэ буолла. Семен Игнатьевич Саха судаарыстыбаннай университетын туруорсан арыйтарбыт дьонтон биирдэстэрэ. Бу үөрүүлээх тэрээһининэн сибээстээн, кини аймахтара кэлэн кыттыыны ыллылар, — диэн кэпсиир Макар Хара аатынан нэһилиэк модельнай бибилэтиэкэтин сэбиэдиссэйэ Екатерина Рахлеева.
Ити курдук, В.И. Ленин аатынан Уолба орто оскуолатыгар бэрт интэриэһинэй түгэн үгүс.
Елена ПОТОЦКАЯ, «Саха сирэ» хаһыат, https://edersaas.ru