Үлэ тигинээн олорор нэһилиэгэ

Бөлөххө киир:

Таатта улууһун Дьүлэй нэһилиэгин эр дьоно сылгыһыттар күннэрин көрсө уонна улуустааҕы ат сүүрдүүтүгэр бэлэмнэнэн, нэһилиэктэригэр субуотунньуктары көхтөөхтүк тэрийэллэр.


Улуустааҕы ат сүүрдүүтүн күрэхтэһиитигэр эрдэттэн бэлэмнэнэн, күрүө тутарга анаан, соторутааҕыта отуттан тахса буоланнар сиэрдийэ маһын кэрдибиттэр. Субуотунньугу нэһилиэк дьаһалтата, аҕалар түмсүүлэрэ уонна сылгыһыттар көҕүлээбиттэр. Мантан салгыы кинилэр эргэ тутуулары көтүрүөхтээхтэрин, нэһилиэги өрө тардарга көмөлөһүөхтээхтэрин кэпсииллэр.

Маны сэргэ, нэһилиэк эр дьоно, аҕалар түмсүүлэрэ куйууру, муҥханы, булка-алка тэринэн барыыны, мас бэлэмнээһинин, от үлэтин, нэһилиэк иһигэр, таһыгар, айылҕаҕа сылдьан бэрээдэктээһини, өрө тардыыны тэрийэллэр, көхтөөхтүк кытталлар. Бу үлэлэригэр кэнчээри ыччаты тардаллар, кинилэргэ үтүө холобур буоларга кыһаллаллар. «Эр дьон буоллаҕа, сүдү күүс. Түмүстүбүт да үлэни-хамнаһы кыайа-хото тутабыт. Дэлэҕэ этиэхтэрэ дуо, ким түмсүүлээх — ол кыайыылаах диэн», — дэһэллэр кинилэр.

+1
0
+1
0
+1
0
+1
0
+1
0
+1
0
+1
0