Кыайыы волонтердара – бу Арассыыйаҕа көхтөөхтүк сайдан иһэр, биир улахан хамсааһын. 2015 сылтан волонтердар Кыайыы параадтарын уонна “Өлбөт үйэлээх полк” хаамыытын ыытарга көмөлөһөллөр.
Ким баҕарар баҕа өттүнэн, үтүө дьулуурунан волонтердар кэккэлэригэр суруйтаран, бэйэтин тус кылаатын киллэриэн сөп.
Бу хамсааһын хайдах саҕаламмытай?
2007 сыл ыам ыйын саҥатыгар Тюмень уобалаһынааҕы полиция батальонун бэтэрээннэрин сэбиэтин бэрэссэдээтэлэ Геннадий Иванов дьикти түүлү түһээбитэ. Кини биир дойдулаахтара бэтэрээннэр мэтириэттэрин туппутунан, киин болуоссатынан хаамсан иһэллэрин түһээн көрбүтэ.
Ол туһунан кини хаһыакка суруйбута. Онтон Кыайыы күнүгэр доҕотторун кытары аҕаларын, эһэлэрин мэтириэтин туппутунан, Тюмень сүрүн уулуссатынан хаампыттара. Эһиилигэр холуонна өссө хаҥаабыта.
2009 сыллаахха Геннадий Иванов бары регионнарга маннык аахсыйаны ыытар туһунан суруктары ыыталаабыта. Кини бачыымын элбэх куорат өйөөбүтэ.
“Өлбөт үйэлээх полк” диэн ааты 2012 сыллаахха Томскай куорат олохтоохторо иҥэрбиттэрэ.
Дьокуускайга 2013 сыллаахха бу идиэйэни “Якутск вечерний” хаһыат өйөөбүтэ. Онно 2 тыһыынча кэриҥэ киһи кыттыбыта.
2016 сыллаахха хамсааһын киэҥ далааһыннаммыта. Москваҕа 700 тыһыынча, Дьокуускайга 18 тыһыынча киһи хаампыта. Оннооҕор Аллайыахаҕа буурҕа да түстэр, кыттааччылары тохтоппотоҕо.
Былырыын Дьокуускайга 33 тыһыынча кэриҥэ киһи кыттыбыта. Хамсааһын сылтан сыл киэҥ далааһыннанан иһэр. Быйыл да мантан аҕыйаҕа суох киһи кыттара былааннанар.
Ангелина ВАСИЛЬЕВА, “Саха сирэ” хаһыат, edersaas.ru