«Ланд-крузер Прадо» сүрүн «ыарыылара»
Мэхээньиктэр ханнык баҕарар массыына мотуора туспа «ыарыылаах» буолар диэн этэллэрин үгүстүк истэбит. Бүгүн кэлиҥҥи кэмҥэ дьон сөбүлээн атах тардыстар көлө
лөрүнэн буолбут «Ланд-крузер Прадоны» билиһиннэрэбит. Сүрүн сүбэһит – автоэлектрик Дьулус Кучаров.«Прадо» сылларынан хас даҕаны көрүҥнээх. Сүрүн «ыарыыларын» кэпсиир буоллахха, маннык.
1990 сылтан 1995 сылга диэри оҥоһуллубут «Прадо»
Билигин саамай эргэнэн ааҕыллар, норуокка «квадратнай Прадонан» биллэр. Кэлиҥҥилэртэн уратыта диэн муосталаах (кузов арааматыгар сыстар), ол иһин, ходобуойа олус бөҕө. Ол эрээри, алдьаннаҕына, өрөмүөннээһинэ уустук соҕус. Кэмигэр көрүнэ сырыттахха, олус үйэлээх. Бу «Прадо» мотуора икки көрүҥнээх: 2 ЛТ уонна 1 КЗД. 1 КЗД мотуор быдан кыахтаах уонна бөҕө. 2 ЛТ мотуорун сыыһа-халты туттан ититтэххэ, головкатын «үрэн» кэбиһиэн сөп. Уота-күөһэ (электрониката) биирдэ эмэ хаппырыыстыыр. Уматык носуоһугар баар датчик хаппырыыстаан уонна боруобаттар быһыта баран, үксүн собуоттаммакка эрэйдиир эбит.
1996 сылтан 2002 сылга диэри оҥоһуллубут 95-тээх «Прадо»
Муоста (ходобуой) оннугар привод олорор. Манна биир мөлтөх миэстэлээх: шаровайа ступицаҕа иҥиннэриллэр өттө аллараа олоро сылдьар эбит. Босхо барыан, ону ааһан, уларыппакка сырыттахха, туллан түһүөн сөп. «Тойота-Сурф» киэнэ эмиэ маннык.
Бензин уматыктаах мотуор икки көрүҥнээх: эрээттээх 2,7-лээх уонна V-курдук 3,4-тээх. Балартан эрээттээх 2,7-лээх мотуор ордук хаппырыыстыыр, салгынын датчиктара кэбирэхтэр. Оттон дизельнэйгэ сэлээркэ паарыттан ордук боруобаттара хатан быһыта баран, мотуор мөлтөхтүк үлэлииригэр тиэрдэр.
2003 сылтан 2009 сылга диэри оҥоһуллубут 120-лээх «Прадо». Бу тимир көлө «убайдарынааҕар» быдан бөҕө, ол эбэтэр мөлтөх өрүттэрэ туоратыллан, лаппа тупсарыллыбыт. Холобур, ходобуойугар инники көлүөһэ шаровайыгар баар рычаг үөһээ олорор. Онон төһө да туллаҥнаабытын иһин шаровайа туллан түспэт. Мотуорун чааһыгар оннук айылаах киһи тутаһара суох эбит. Кэмигэр уларыйыахтаах чаастары уонна арыыны уларытан истэххэ, туох да буолбат, соруйан алдьаппатахха, төһө баҕарар өр сулууспалыыр.
2009 сылтан 2016 сылга диэри оҥоһуллар 150-наах «Прадо»
Мөлтөх өрүтүн соччо-бачча көрдөрө илик эбит. Ходубуойа 120-лээх «Прадоттан» атына суох. Арай, уруулугар баар датчиктара аккаастаабыт тимир көлөлөрү Дьулус Кучаровка хаста да аҕалан көрдөрө сылдьыбыттар. Аныгы иномаркаларга үксүлэригэр уруул хайдах балаһыанньалааҕын көрдөрөр датчиктар бааллар. Бу датчик туормас систиэмэтэ үлэлииригэр көмөлөһөр Холобур, уҥа эбэтэр хаҥас салайан иһэн, эмискэ туормастаатахха, массыына баран иһэр инерциятын ааҕан-суоттан биэрэр аналлаах.
Саҥа «Прадо» уота-күөһэ (электрониката) хайдаҕа-туга эмиэ соччо-бачча биллэ илик. Арай, хаһаайыттар бэйэлэрэ хасыһан, алдьатар түгэннэрэ баар. Ол курдук, ааҥҥа эбии уоту туруора сылдьан, атын боруобаттары эбии холбоон, ол кыһын тымныыга тоһута баран, самыкаанньалаабытын көрдөрө сылдьыбыттар. Онон сатаабат буоллахха, бэйэ ылсара наадата суох. Исписэлиистэргэ көрдөрөр быдан көдьүүстээх.