Атырдьах ыйын саҥатыгар «Атласовтар уһаайбалара» этнокомплекс хаһаайыттара дьаҥтан харыстанар сонун ньыманы тобуллулар.
edersaas.ru
Бу туһунан урбаанньыт Николай Атласов маннык билиһиннэрдэ:
— Сыстыганнаах дьаҥ аан дойдуга тарҕаныаҕыттан ыла, бу сайдыылаах үйэҕэ харыстанар ньыманы көрдөөһүн үксээтэ. Сахаларга сэбиргэхтэтэр ыарыыттан харыстанар үүнээйилэрэ өбүгэ саҕаттан баара биллэр. Биир оннук сэллик ыарыыны эмтиир кыахтаах үүнээйинэн лабыкта буолар. Мин Москва уонна Дьокуускай куорат чинчийэр лабораторияларыгар бэйэлээх бэйэбит лабыктабытыттан экстракт оҥорторон анаалыска ыыппытым. Манна эбии зверобой отун уонна киэҥник аатырбыт таба муоһун эмтээх састаабын чинчиттэрбитим.
Ол кэннэ бу эттиктэри мунньан, анал састаап оҥорторон, научнай докумуонун толорторон, бу күннэргэ «ПРИРОДОДАР» диэн ааттаах саҥа табаарбытын туттубут. Атыыга тахсыбыт антисептик буоларын быһыытынан киһи илиитигэр батар «нано-спрей» диэн тэриллээх. Ол эбэтэр туттаргытыгар «нано-спрей» иһигэр антисептигы куттан баран, биир соҕотох кунуопканы баттаан, сирэйгэр, илиигэр ыстарынаҕын. Спрей аныгы технологиянан үлэлиир буолан, антисептигы быыл курдук «микрочастицаларга» арааран, киһи тириитигэр түргэнник уонна дириҥник киллэрэр. Онон туһата хас эмэ тыһыынча төгүл күүһүрэр. Аны таба муоһун эттигэ баар буолан, киһи тириитэ биллэ тупсар. Баастаах, мыччыстыгас тириилээх дьоҥҥо эмиэ туһалыыр. Барыгытын айылҕа биэрбит күүстээх антисептигынан туһаныҥ, доруобуйаҕытын харыстаныҥ диэн ыҥырабын.
Уопсайынан, Николай Атласов лабыктаны кытта «доҕордоспута» быданнаата. Ол курдук, 2018 сыллаахха «Кыһын Саха сириттэн саҕаланар» кыһыҥҥы туризм тэрээһинигэр лабыктаттан минньигэс кэмпиэт оҥорбута, урбаанньыты «Саха сирин амтана» гастрономия бэстибээлигэр кыайыылааҕынан оҥорбута.
Бу тэрээһиҥҥэ сыл аайы кыттар «Атласовтар уһаайбалара» эрэстэрээн мэлдьи туох эрэ сонуну толкуйдуур буолан, тэрийээччилэр да, суруналыыстар да кинилэртэн туох эрэ ураты интэриэһинэйи, хаһан да истибэтэхпитин уонна көрбөтөхпүтүн кэтэһэбит баар суол.
Дьэ, онон лабыкталаах кэмпиэт уонна килиэп оҥоһуллубутун тэҥэ, «Саха сиригэр оҥоһулунна» диэн дьарылыкка бу үүнээйиттэн аны бэйэни харыстанар, ыраастанар антисептиги киллэриэххэ сөп буолла.
Елена ПОТОЦКАЯ, «Саха сирэ» хаһыат, edersaas.ru