Өлөөннөр малааһыҥҥа бэлэмнэнэллэр

Ааптар: 
Бөлөххө киир:

2017 сыл балаҕан ыйын 1 күнүнэн дьону хаарбах туруктаах дьиэлэртэн көһөрүү бырагыраамата түмүктэнэр. Ити кэмҥэ диэри, 2012 сыл тохсунньу 1 күнүнээҕи туругунан хаарбах туруктааҕынан билиниллибит 11 мөлүйүөн кв. м иэннээх дьиэ олохтоохторо саҥа дьиэлэргэ көһөрүллүөхтээхтэр. Саха Өрөспүүбүлүкэтигэр 500 тыһыынча кв. м иэннээх дьиэттэн 30-ча тыһыынча киһи саҥа сиргэ көһөрүллэрэ былааннанар.

Роман ПОПОВ, “Саха сирэ” хаһыат, edersaas.ru


 

Саха сиригэр хаарбах дьиэлэртэн дьону көһөрүү бырагырааматыгар кыттар 43 муниципальнай тэриллии ортотугар Өлөөн эбэҥки национальнай улууһа инники күөҥҥэ иһэр. Бырагыраама үлэлиэҕиттэн манна 4 593 кв. м иэннээх олорор дьиэ үлэҕэ киллэрилиннэ. 2017 сыл балаҕан ыйын 1 күнүгэр диэри эбии 1265 кв. м иэннээх дьиэ тутуллара былааннанар.

Күн бүгүн Өлөөҥҥө 12 квартиралаах дьиэ, Харыйалаахха 6-лыы уонна 4-түү квартиралаах дьиэлэр тутуллаллар. Оттон Дьэлиҥдэҕэ икки 4-түү квартиралаах дьиэ тутуута үмүрүйэн эрэр.

Соторутааҕыта Өлөөн сэлиэнньэтин олохтоохторугар  — Рожиннар дьиэ кэргэттэригэр Арассыыйа Федерациятын Судаарыстыбаннай Дууматын дьокутаата Галина Данчикова ыалдьыттаата. Вероника уонна Василий Рожиннар үс оҕону иитэллэр. Былырыын ахсынньыга хаарбах дьиэттэн көһөрүү бырагырааматынан саҥа, толору хааччыллыылаах квартираҕа киирэн малааһыннаабыттара.

“Саҥа дьиэбит олус сылаас, биэс уон кыраадыстаах бытархан тымныыны билбэккэ кыстаатыбыт, — диэн үөрүүтүн үллэстэр ыал ийэтэ Вероника. – Эргэбит олус тымныы этэ, ититэр тэрилбитин күнүстэри-түүннэри холбонон олорорбут.”

Кини эппитинэн, саҥа квартираланыахтарыттан дьиэлээхтэр настарыанньалара өрө көтөҕүллэн сылдьар, оҕолор туспа хостоммуттар.

“Хотугу сиргэ дьону хаарбах дьиэттэн көһөрүү бырагыраамата олоххо киириэҕиттэн, олох хаачыстыбата биллэ тубуста. Өлөөҥҥө үгүстэр саҥа квартиралар хаһаайыннарынан буоллулар”, — диир Вероника.

Галина Данчикова бэлиэтээбитинэн, Хотугу сиргэ олорор дьиэлэри толору хааччыллыылаах оҥоруу олох усулуобуйатын тупсарыы эрэ буолбатах. Бу, бастатан туран, нэһилиэнньэ доруобуйатын бөҕөргөтүү, этэҥҥэ буолуутун хааччыйыы буолар.

Ол гынан баран, улуус баһылыга Александр Иванов хаарбах туруктаах дьиэ билигин да элбэҕин, онон улуус олохтоохторо бу бырагыраама 2017 сыл кэнниттэн салгыы үлэлиэҕэр эрэнэллэрин этэр. Билиҥҥитэ оройуоҥҥа хаарбах туруктааҕынан билиниллибит 17 тыһыынча кв. м иэннээх 88 дьиэ баар.

Олорор дьиэ боппуруоһун улуус салалтата болҕомтоҕо тутар. Хаарбах дьиэлэртэн дьону көһөрүү бырагырааматын сэргэ, Өлөөҥҥө олорор усулуобуйаны тупсарыыга туһуламмыт атын бырагыраамалар эмиэ үлэлииллэр. Ол курдук, былырыын 18 эдэр ыалга дьиэ сертификата бэриллибит буоллаҕына, 2017 сылга федеральнай уонна өрөспүүбүлүкэтээҕи бүддьүөттэн итинник көмөнү үс төгүл элбэх ыал ылыаҕа диэн буолар. Быйыл улуус киинигэр, “Молодежнай” кварталга, хочуолунай, 98 миэстэлээх оҕо уһуйаанын тутуута саҕаланыаҕа.

Галина Данчикова Өлөөн олохтоохторун кытта сэһэргэһиитигэр дьону дьиэлээһин боппуруоһун биирдэ быһаарар кыаллыбатын, ОДьКХ-ны тупсарыы пуондатын көмөтүнэн түһүмэхтэринэн ыытыллара көдьүүстээҕин эттэ. Бу сытыы кыһалҕаны дойду бэрэсидьиэнэ уонна Саха Өрөспүүбүлүкэтин Ил Дархана тус хонтуруолларыгар туталларын ыйда.

Санатар буоллахха, 2016 сыллаахха Саха сиригэр 605,1 тыһыынча кв м иэннээх олорор дьиэ үлэҕэ киллэриллибитэ. Егор Борисов туруорбут соругунан, бу көрдөрүү 2022 сылга 900 тыһыынчаҕа диэри тиэрдиллэрэ күүтүллэр.

Роман ПОПОВ, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0