«Өлүөнэ очуостара» федеральнай таһымнаах национальнай паарка аатын ылла

Бөлөххө киир:

Атырдьах ыйын 6 күнүгэр вице-премьердары кытта мунньах кэмигэр дойду премьер-миниистирэ Дмитрий Медведев Саха сиригэр «Өлүөнэ очуостара» федеральнай таһымнаах национальнай паарка тэриллэрин туһунан бырабыыталыстыба дьаһала тахсыбытын туһунан иһитиннэрдэ.

edersaas.ru


Бу дьыл от ыйыгар Ил Дархан э.т. Айсен Николаев айылҕа баайын уонна экология миниистиригэр Дмитрий Кобылкиҥҥа «Өлүөнэ остуолбаларын» тулалыыр айылҕатын харыстыырга, национальнай паарка таһымын федеральнай суолтаҕа диэри үрдэтэргэ туруорсубут.

«Бүгүн биһиги өр кэмҥэ туруулаһар сырабыт үтүө түмүктэннэ. Федеральнай суолталаах национальнай паарка тэрилиннэ. Онон Сахабыт сирин ытык кэрэ сирин харыстыырга, салгыы сайыннарарга эбии үп-харчы киириэҕэ, аан дойду араас муннуктарыттан туристар интэриэстэрэ үрдүөҕэ», — диэн эттэ Айсен Николаев.

«1,2 мөл. га иэннээх улахан сиргэ баар «Өлүөнэ очуостара» 2012 с. ЮНЕСКО аан дойдутааҕы нэһилиэстибэтин эбийиэктэрин ахсааныгар киирбитэ. Бу паарканы атын ханна да көстүбэт үүнээйилэр киэргэтэллэр. Кыһыл кинигэҕэ киирбит, бэрт сэдэх кыыллар, хамсыыр харамайдар, көтөрдөр манна бааллар. Айылҕа биэрбитин харыстыыр – биһиги сүрүн иэспит», — диэн бэлиэтээтэ Арассыыйа бырабыыталыстыбатын бэрэссэдээтэлэ Дмитрий Медведев.

Вице-премьер Алексей Гордеев: “Национальнай пааркаҕа Кыһыл кинигэҕэ киирбит хамсыыр харамай 38 көрүҥэ баар, 100 тахса көтөр арааһа уйаланар. «Өлүөнэ очуостара» кембрийскай үйэ саҕаттан 500 мөл. сыл тухары туран кэллилэр. Бу паарка аан дойду геологическай эбийиэктэрин харыстыыр испииһэккэ киирэн турар”, — диэн быһаарар.

Докумуоҥҥа сурулларынан, «Өлүөнэ очуостара» Национальнай паарка Хаҥалас, Өлүөхүмэ, Алдан улуустарыгар 1 217 941 гектар сиргэ тайаан сытар. Паарканы тэрийии сүрүн сыалыгар Өлүөнэ уонна Буотама өрүстэр хочолорун харыстааһын эмиэ киирэр.

Марианна ТЫРТЫКОВА, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0