Бу күннэргэ Өлөөн улууһун Дьэлиҥдэ нэһилиэгэр олохтоохтор өр күүппүт баҕа санаалара туолла.
edersaas.ru
Нэһилиэккэ «Гудей» диэн эргиэн дьиэтэ аһылынна. Эбэҥки тылыттан тылбаастаатахха «үчүгэй» диэн өйдөбүллээх саҥа сырдык дьиэ-уот, кырдьык да, үчүгэй. «Гудей» эргиэн-киинигэр аһы-үөлү атыылыыр сэттэ «туочука», үс хаһаайыстыбаннай маҕаһыын, парикмахерскай уонна гостиница үлэлиэхтэрэ.
— «Гудей» предпринимателлэр биир сиргэ кииннэнэн үлэлииллэригэр тоҕоостоох усулуобуйаны үөскэтиэҕэ уонна атын да дьон бэйэ дьыалатын тэринэллэригэр көҕүлүөҕэ, — диэн эргиэн киинин үөрүүлээхтик аһарыгар бэлиэтээтэ улуус баһылыга Александр Иванов.
Олохтоох предпринимателлэр киинэммит комплекстарын дириэктэрэ, бу бырайыагы көҕүлээччи Алёна Христофорова дьоҕус бизнес сайдыытын өйүүр оройуон салалтатын уонна бөдөҥ тэрилтэлэр салайааччыларыгар уонна биир дойдулаахтарыгар истиҥ махталын тиэртэ.
Өлөөн курдук киин сиртэн ыраах улууска предпринимателлэр киинэммит комплекстарын арыйыы — 2019 сыл бастакы ситиһиитинэн буолла.
Елена ПОТОЦКАЯ, «Саха сирэ» хаһыат, edersaas.ru
+1
+1
+1
+1
+1
+1
+1