Өлүөхүмэтээҕи медик-волонтердар көмөлөрө муҥура суох

Ааптар: 
Бөлөххө киир:

Өлүөхүмэтээҕи медик-волонтердар бөлөхтөрө кырдьаҕас дьоҥҥо дьиэлэригэр да тиийэллэр, сөмөлүөтү даҕаны көрсөллөр, оннооҕор дьиэлэрин өрөмүөннүүллэр.

edersaas.ru

Үс сыллааҕыта Өлүөхүмэҕэ Нерюнгритааҕы мэдиссиинэ кэллиэһин филиала аһыллыбытыгар, онно үөрэнэ киирбит үлэһит-устудьуоннартан аан бастакытын медик-волонтердар бөлөхтөрө тэриллибит.

“Волонтердар бөлөхтөрө тэриллиэҕиттэн дьиэлэринэн сылдьан саастаах дьоҥҥо, учаастактааҕы быраастарга көмөлөһөллөр, хаан баттааһынын кэмнииллэр, оннооҕор дьиэлэрин өрөмүөннээбиттэрэ. Үгүстэр үс сыл анараа өттүгэр маҥнай бөлөххө киирбиттэрэ. Күн бүгүн 17 кыыс үлэлиир. Билигин аан дойду үрдүнэн турбут коронавирус инфекциятынан сибээстээн, саастаах дьон дьиэлэригэр олороллор. Онон волонтердар көмөлөрө эрэйиллэр буоллаҕына, быһаччы регистратураҕа эбэтэр улуустааҕы волонтердар нүөмэрдэригэр төлөпүөннүүллэр, кинилэр биһиэхэ тиэрдэллэр. Сүрүннээн быраас суруйбут ырысыабынан эмп-томп илдьэн биэрэллэр, көрөллөр-истэллэр. Ону таһынан, сөмөлүөтү көрсөллөр, анкета толоттороллор. Холобур, бүгүн 6 кырдьаҕаска сырыттылар. Сарсын икки киһи дьону таһар сөмөлүөтү көрсүөхтэрэ”, — диэн онкология кэбиниэтин сиэстэрэтэ, волентердар тэрийээччилэрэ Маргарита Воронина иһитиннэрэр.

Медиктэри таһынан, улуустааҕы волонтердар этэрээттэрэ үлэлиир. Олохтоох дьаһалта массыына көрөн, дьиэлэригэр олорор кырдьаҕастарга сакааһынан аһылык, күннэтэ туттуллар табаары тиэрдэллэр.  Онон Өлүөхүмэтээҕи волонтердар эбээһинэстэрин үллэстэн, аҕам саастаах дьоҥҥо көмөлөрө улахан, эппиэтинэстэрэ үрдүк.

Людмила ПОПОВА, edersaas.ru

+1
0
+1
0
+1
0
+1
0
+1
0
+1
0
+1
0