Өлүөхүмэ улууһа быйыл саас бурдугу 534 гектарга, сүөһү сиир култууратын 717 гектарга ыһар, хортуоппуйу 844 гектарга оттон аһаҕас буорга үүнэр оҕуруот аһын 43 гектарга олордор былааннаах.
edersaas.ru
Улуус сүрүн хаһаайыстыбата, «Өлүөхүмэ кыладабыайа» ХЭУо, Амма Өлүөхүмэтин отделениета ньэчимиэн ыһыытыгар киирдэ. Ол туһунан олохтоох дьаһалта тыа хаһаайыстыбатыгар исписэлииһэ Лилиана Перевалова маннык кэпсиир:
– Хаһаайыстыба мэхэньисээтэрдэрэ ааспыт нэдиэлэҕэ сииги саптарыыга үлэлээбиттэрэ. Ону бүтэрээт, 50 гектар бааһынаҕа ньэчимиэн ыһыытыгар туруннулар. Салгыы сүөһү сиир култууратын ыһыыга киириэхтэрэ, ол курдук сиилэскэ уонна сенажка анаан 519 гектарга кукуруза, подсолнух, Судан отун, уонна виканы, эбиэстээх виканы ыһыахтара. «Туймаада» ҮАПК Голландияҕа оҥоһуллубут сиэйэлкэни ылан биэрдэ. Оттон от ыйын бүтүүтүгэр элбэх сыллаах оту ыһыахтара, ол сиэмэтэ уу суолунан кэлиэхтээх. Онон, халлаан тугу уунарын манаабакка, үүнүүнү бааһынаттан ылан, сүөһү аһылыгын хааччыйарга суоттанабыт. Сөп буолар сиэмэ уонна минеральнай уоҕурдуу баар. Сааскы ыһыыга барыта уон тыраахтар үлэлиэҕэ.
Тыа хаһаайыстыбатын министиэристибэтин «Сүөһү аһылыгын бэлэмнээһин» бырагырааматын чэрчитинэн, нэһилиэк уонна улуус хос үбүлээһиннэринэн, кэлиҥҥи сылларга балачча элбэх тиэхиньикэ: культиватор, дискатор, сиилэс хамбаайына, бурдугу быһар, оту охсор уонна рулуоннуур ылылыннылар. Былырыын «Т-150» тыраахтар ылыллыбыта. Ити барыта үлэни-хамнаһы тэрийиигэ төһүү буолар. Ыһыыны сэргэ бааһыналары бүтэйдээһин үлэтэ барар. Быйыл бу үлэҕэ Дьарыктаах буолуу киинин чэрчитинэн, 13 үлэтэ суох киһи тардылыннар.
Дарья Тимофеева, «Саха сирэ» хаһыат, edersaas.ru