Өлүөхүмэ улууһун саамай бөдөҥ хаһаайыстыбата «Өлүөхүмэ кыладабыайа» ХЭУо Үҥкүргэ Түбэ сайылыгын саҥардан эрэр.
edersaas.ru
—— Билигин өссө 1971 сыллаахха тутуллубут эргэ сайылыкка үлэлии сылдьабыт, ол иһин «Туймаада» агрохолдинг» АУо көмөтүнэн аныгы ирдэбилгэ эппиэттиир сайыҥҥы пиэрмэни туттабыт, – диир хампаанньа генеральнай дириэктэрин сүбэһитэ Сергей Несмелов. – Уопсайынан, материальнай баазаны саҥардарга ылыстыбыт. Бастатан туран, саҥа сайылык биир сүрүн өттө – ыыр зал тутуута саҕаланна, бу зал 3,5 чаас устатыгар 400 ынаҕы ыыр кыамталаах, ыаһынтан саҕалаан комплексы сууйарга тиийэ үлэтэ барыта автоматиканан салайыллар. Онон массыынанан ыаһын операторын үлэтэ биллэрдик чэпчэтиллиэҕэ. Билигин хас биирдии ыанньыксыт 40 ынаҕы көрөр, баалабайынан күҥҥэ 550 — 600 киилэ үүтү ыыр. Толору хааччыллыылаах сайылык астыыр кэмбинээти үрдүк хаачыстыблаах үүтүнэн хааччыйыаҕа.
Маны таһынан быйыл Үҥкүргэ сиилэс траншеята уонна толору хааччыллыылаах эти астыыр сыах тутуллуоҕа.
«Саха сирэ» хаһыат, edersaas.ru саайтка анаан
Валерий Малышев, Өлүөхүмэ