Дойдуга, ол иһигэр Саха сиригэр, доруобуйа харыстабылын сайдыытыгар дьоһун суолталаах хайысханан ыарыыны эрдэттэн сэрэтии уонна ыраах сытар нэһилиэнньэлээх пууннарга мэдиссиинискэй көмө табыгастаах буолуутун хааччыйыы буолар.
edersaas.ru
Өлүөхүмэ оройуонугар кэнники икки ыйга быраастар көһө сылдьар биригээдэлэрэ үлэлээтэ. Ол курдук, кулун тутар 10-13 күннэригэр Өлүөхүмэ улууһун оройуоннааҕы киин балыыһатын исписэлиистэрэ Хоро уонна Урицкай нэһилиэктэригэр диспансеризацияны ыыттылар. Хирург, уопсай быраактыка бырааһа, нарколог-психиатр, педиатр, энодокринолог, дерматовенеролог, невролог састааптаах биригээдэ үлэлээтэ. Өлүөхүмэ оройуоннааҕы балыыһатын кылаабынай бырааһа Марфа Бурцева ыҥырыытынан, офтальмология өрөспүүбүлүкэтээҕи клиническэй балыыһатын офтальмолог-бырааһа Евгения Никифорова кэлбитэ олус үөрүүлээх.
Хоро уонна Урицкай сэлиэнньэлэрин олохтоохторо бары исписэлиистэргэ үөрэ-көтө сырыттылар. Балыыһаҕа эмчиттэргэ киирэргэ уочарат буолла. Быраастар сарсыарда 8.30-20.00 чааска диэри оҕолору уонна улахан дьону көрдүлэр. Диспансеризация чэрчитинэн, эмчиттэр киэһэ 8 чаас кэнниттэн 10 ыарыһаҕы, “сэрии оҕолоро” диэн араҥаҕа киирсэр кырдьаҕастары дьиэлэригэр тиийэн көрдүлэр.
«Нэһилиэнньэ исписэлиистэртэн сүбэ-ама ылбытыттан олус үөрэбит. Үгүс дьоҥҥо оройуоннааҕы балыыһаҕа салгыы көрдөрөллөрүгэр эттилэр. Биир идэлээхтэрбит 70-тан тахса улахан киһи уонна 46 оҕо доруобуйатын көрдүлэр. Невролог-быраас Юрий Меняйлов нэһилиэнньэ доруобуйатын көрөрүн сэргэ, инсультан хайдах харыстанар туһунан лиэксийэ аахта.
Урицкай олохтоохторо олус элбэх саҥаны биллилэр, эндокринолог уонна офтальмолог курдук сэдэх быраастар кэлбиттэриттэн үөрэллэрин эттилэр. Оройуоннааҕы балыыһа салалтатыгар улахан махталбытын биллэрэбит”, — диэн Урицкай нэһилиэгинээҕи биэлсэр пуунун сэбиэдиссэйэ Ирина Фролова иһитиннэрдэ.
“Бу күннэр усталарыгар 360 киһи көрдөрүммүтүттэн 160-на – оҕолор. Оҕолор ыарыылара сүрүннээн сыыһа аһааһыны уонна биэссэстибэлэр атастаһыылара кэһиллиитин кытта сибээстээҕэ, ыйааһыннара тиийбэтэ эбэтэр, төттөрүтүн, уойаллара билиннэ. Ону сэргэ, үгүс киһи дьуот тиийбэтин кытта сибээстээх диффузнай эндемическай зобтааҕа билиннэ”, — диэн оройуоннааҕы киин балыыһа эндокринолога Мария Елаева санаатын үллэһиннэ.
Элбэх киһи уопуттаах хирург Афанасий Савватеевтан сүбэ-ама ылла. Афанасий Харлампьевич улахан дьону сэргэ, кырачааннарга эмиэ болҕомтотун уурда.
“Быраастар биригээдэлэрэ олус улахан үлэни оҥордо. Биир идэлээхтэрбэр ситиһиилээх үлэлэрин иһин махтал. Ону таһынан, Өлүөхүмэ улууһун баһылыга Николай Харбин быраастар баралларыгар-кэлэллэригэр массыынанан хааччыйбытыгар махтанабын. Нэһилиэнньэ диспансеризацияҕа кыттарыгар офтальмология өрөспүүбүлүкэтээҕи балыыһатын кылаабынай бырааһа Анатолий Назаров улаханнык өйөөтө.
Эбэн эттэххэ, эмчиттэр биригээдэлэрэ инникитин да кэлиэхтэрэ. Кулун тутар 17-21 күннэригэр быраастар Киндигиир сэлиэнньэтигэр диспансеризацияны ыытыахтара. Салгыы Тээнэ, Бэс Күөл, Токко уонна Уолбут сэлиэнньэлэргэ бараллара былааннанар”, – Өлүөхүмэ улууһун оройуоннааҕы киин балыыһатын кылаабынай бырааһа Марфа Бурцева кэпсэтиибитин түмүктээтэ.
“Саха сирэ” хаһыат, edersaas.ru cайтка анаан Ольга ГОЛИКОВА