Кыыллаахтар сайылыкка киириини бэлиэтээбиттэрэ ыраатта

Ааптар: 
Бөлөххө киир:

Ил Дархан Айсен Николаев ыам ыйын 22 күнүгэр Сайылык күнүн бэлиэтиир туһунан Ыйаахха илии баттаата. Ити, докумуонунан чопчу күнү анааһын буолар. Былыр да, быйыл даҕаны саха киһитигэр сайылыкка көһүү улахан суолталаах. Өлүөхүмэ улууһун Кыыллаах нэһилиэгин олохтоохторо ити үгэһи 2013 сылтан тутуһаллар.

edersaas.ru


Лена Данилова, “Алгыс” култуура киинин дириэктэрэ:

— Нэһилиэнньэ Кыыллаах Арыыттан Даппарайга көһөн тахсан, онно Ыһыах сирин оҥотторон ыһыахтыыр буолбута. Онтон ыла Арыыбыт дьонугар, тыа хаһаайыстыбатынан дьарыктанааччыларбытыгар анаан 2013 сыллаахха “Түптэ буруо ахтылҕана” диэн ааттаан бастакы Ыһыахпытын Тыымпы күөл үрдүгэр ыыппыппыт. Дьон Ыһыах ыытыллыбыт сириттэн, тэрээһинтэн астыммыттарын, сөбүлээбиттэрин биллэрэн, сылын ахсын бэйэбитигэр “Сайылык ыһыаҕа” ыытар буолуоххайыҥ диэн этии киллэрбиттэрэ. Даппарайга туспа ыһыах ыһабыт. Оттон Арыыбытыгар сороҕор “Окко киирэр күүлэй” диэн ааттаан, от ыйыгар бэлиэтиибит.

Нэһилиэк дьонун күүстээх үлэҕэ киириэхтэрин иннинэ сынньатан “Сайылык ыала” диэн күрэхтэһии оҥоробут, уруккуну санатар хорчуопкалары тэрийэн (итии миин, үүттээх чэй) босхо аһатабыт. Ону таһынан кымыс, үтэһэлээх эт, араас ас атыылааччылар кэлэн эмиэ атыылыыллар. Эҕэрдэ тыл, сайылыкка киирии театрализациятын туруорабыт, кэнсиэри, күн иккис аҥаарыгар улахан дьоҥҥо “Дыгын оонньууларын”, кырачааннарга “Сайылык оҕолоро” күрэстэри тэрийэбит, кэрэ аҥаардарга “Халадаайдаах сүүрүү” буолар.

Быйыл кыргыттарга курдаһан тустууну, эдэр уолаттарга этэрбэс тэбиини, ону таһынан “Саха быһаҕа — аҕам бэлэҕэ” диэн биһиэхэ сонун күрэхтэһиилэри киллэрдибит, — диэн кэпсиир.

Кыыллаахтар — Өлүөхүмэ улууһугар тыа хаһаайыстыбатынан дьарыктанар нэһилиэктэртэн биир бастыҥнара. Үүт туттарыыга инники күөҥҥэ сылдьаллар диэтэхпинэ, бука, сыыспатым буолуо. Окко киирии кинилэргэ улахан суолталаах, күөххэ үктэммиттэрин бэлиэтигэр көрү-нары көҕүлүттэн тутан көрсөр үтүө үгэстээхтэр. Бүгүн ити Ил Дархан Ыйааҕынан бигэргэннэ.

Людмила ПОПОВА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0