Саха сирин дэлэгээссийэтэ Кытайтан көтөн кэллэ. Кинилэр кыталыктар кыһыҥҥы кыстыыр сирдэрин баран көрдүлэр.
Ол курдук, Кытайга Цзянси провинцияҕа бу провинция норуодунай бырабыыталыстыбатын ыҥырыытынан тиийэ сырыттылар. Бу сырыы сыалынан-соругунан Саха сириттэн тиийэр кыталыктар бу дойдуга хайдах кыстыылларын көрдүлэр, бу сэдэх көтөрү харыстааһыҥҥа ыытыллар үлэни билистилэр.
Биллэрин курдук, кыталыктарбыт Поянху күөлгэ кыстыыллар. Манна аан дойдуга баар кыталыктар 98 бырыһыаннара кыстыыр.
“Урут бу мааны көтөрдөр айаннарын үс суола баара: арҕааҥҥы, киин уонна илиҥҥи. Оттон билигин арҕаа уонна киин туһаайыыларынан айаннара сэриилэртэн уонна браконьердартан сылтаан тохтообута. Онон Саха сириттэн көтөн тиийэр кыталыктар илиҥҥи хайысханан көтөллөр”, — диир РНА Сибиирдээҕи салаатын Криолитозона биологическай проблемаларга институтун научнай сотруднига Инга Бысыкытова.
Кытайга ойуур тэрилтэлэрэ, тыа сирин олохтоохторо уонна көтөрдөрү таптааччылар ассоциациялара көтөн тиийэр көтөрдөргө олус харыстабыллаахтык сыһыаннаһаллар эбит. Кыталыктар таптаан сиир лотостарын плантациятыгар анаммыт 33 гектар сири түүлэһиигэ 2 мөл. юань солкуобай кэриҥэ харчыны бу көтөрү таптааччылар хомуйбуттар.
Саха сиригэр эмиэ кыталыктарга улахан болҕомто ууруллар буолбута ыраатта. Олохтоохтор көтөрү уоран бултаабаттар, төрүүллэригэр-ууһулларыгар уйгуурдубаттар. Ордук бу үлэ күүскэ Аллайыаха улууһугар ыытыллар.
Женни Стрюкова.
Хаартыска: интэриниэттэн