Саха дьонун аймаабыт Өймөкөөҥҥө баран иһэр бэлисипиэттээх кытай туриһын айанын “Халыма” трассата ааһар улуустарын дьоно бары да кыраҕытык кэтии олороллор.
Елена Потоцкая, «Саха сирэ» хаhыат, edersaas.ru
Ол туоһутун, Чурапчыны ааспытын, Тааттаҕа тиийбитин туһунан хаартысканан бигэргэтиллибит араас сонуну билэр дьонум миэхэ ыыта олороллор. Онон бу күннэргэ, бэйэм да билбэппинэн, “Кытай туриһын ыстааба” буола олоробун. Аҕыйах чаас анараа өттүгэр “Китаец велосипеда алдьаммыт. Төптөрү гаазтаабыт кытайыгар. Хорош, ычча диир үһү. Хата, кини дьолугар сылаас күннэр дии”, — диэн иһитиннэрии кэлбитэ. Биллэн турар, бу суругу көннөрбөккө, хайдах суруллубутунан биэрэбин. Ол кэнниттэн тута Тааттаттан: “Кытай бу мин нэһилиэкпэр тиийбит. Пономаревтар диэн ыалга ыалдьыттыы олорор”, — диэн билэр киһибиттэн хаартыскалаах иһитиннэрии кэлбитэ. Ол кэннэ аны “Таатта” тэлэбиидэнньэтин салайааччыта Вера Матвеева миэхэ: “Велосипедтаах кытайбыт Таатта Дьохсоҕонугар кэлбит. Кулуупка көрсүһүү тэрийэн эрэллэр”, — диэн батсаапка суруйбута.“Ыстаап үлэһитэ” итиччэни истэн баран олоруом дуо, суруналыыс разведчик тэҥэ буоллаҕа, өтөр гыммакка, Пономаревтары булан ыллым.
Дьиэлээх хаһаайка Гликерья Михайловналыын кытайбыт туһунан маннык кэпсэттибит:
— Кытай туриһа эһигини хантан булан ылла?
— Биһиги трасса кытыытыгар олоробут. Уолум таhырдьа сырыттаҕына, ыҥыран ылбыт. Уопсайынан, ааһан иһэр дьону ыҥыра турар үһү. “Хонноруоххут дуо?” –диэн ыйытар үһү.
— Ол хайдах кэпсэппиттэрий? Кытайдыы эрэ саҥарар үһү дии?
— Тылбаастыыр төлөпүөннээх үһү. Арай уолум ырдьаччы тоҥмут киһини сирдээн киллэрбитигэр соһуйдум аҕай. Таҥаһа чарааһа сүрдээх. Хайдах киирбит киһини үүрэн таһаарыахпытый? Саха ыалдьытымсах сиэринэн хоноһобутун чэйдэттэхпит дии. Батсаапка edersaas.ru сайтка эн матырыйаалларгын ааҕан, кытай киһитэ бэлисипиэтинэн Өймөкөөҥҥө баран иһэрин истэ-билэ сылдьабыт. Онно омуктары көрсөр дьахтар баарын туһунан суруйбут этиҥ дии. Уолбут суолбуттан халбарыйбаппын, салгыы Өймөкөөннүүбүн дии олордоҕуна, аны кулуупка көрсүһүүтэ тэрийиҥ диэн көрдөһөн, онно илдьэ бардылар.
— Мантан антах киһитэ-дьиэтэ суох сиргэ тиийэрин эҥин өйдөтө сатаабатыгыт дуо?
— Ол эрэ буолуо дуо, бөрөнөн эҥин куттуу сатаатыбыт. Киһиҥ хата саха быһахтаах эбит. Онтун көрдөрөр. Уонна газовай баллоннаах. Онтун көрдөрө-көрдөрө “манан куттуом” диир. Киһи да күлэр. “Эн бэлисипиэтинэн айаҥҥын Саха сирэ барыта кэтии олорор”, — диэн кэпсээтибит. edersaas.ru сайт матырыйаалларын көрдөрдүбүт. Онуоха киһибит үөрэр аҕай. Тэрээһини уста “Таатта” тэлэбиидэнньэтэ кэлбит үһү.
— Эчи, хомулла охсоргут да түргэнэ бэрт дии…
— Ама, батсаап үйэтигэр!
— Туох идэлээх киһиний? Ыал дуо?
— 35 саастаах. Кэргэннээх, биир оҕолоох үһү. Физкультура учуутала эбит. Үөрэтэр оҕолоругар киһи ханнык да усулуобуйаҕа кытаанах санаалаах буолуохтаах диэн үөрэтэрин дакаастыыр эбит. Онон ылыммыт соругун хайаан да толорор былааннаах. Кырдьык, кытаанах санаалаах киһи быһыылаах…
Дьэ, онон уолбут туһунан бүтэһик иһитиннэрии итинник. Сарсын хорсун санаалаах кытай туриһа салгыы Өймөкөөннүүр суолу тутуһар. Аны кинини томполор түбэһэн салгыы сырдатыахтара. Ол кэннэ… эдэр киһи Айыы Таҥара илиитигэр киирэр. Көрөн иһиэхпит буоллаҕа.
Елена Потоцкая, edersaas.ru