Бэрдьигэстээххэ эдэр дьон кырдьаҕастарга муус ылан биэрдилэр. Бу үтүө көҕүлээһини Горнай улууһун киинин Бэрдьигэстээх сэлиэнньэтин ыччат түмсүүтэ тэрийдэ. Кинилэр түмсэ түһэн, күһүн аайы муус ылан баран, биэнсийэлээхтэргэ илдьэн биэрэллэрэ номнуо үгэскэ кубулуйда.
Аан бастаан олохтоох спортивнай оскуола мини-футболга тренерэ Аркадий Васильев бэйэтин күүһүнэн уонча сылы быһа муус ылан, кырдьаҕастарга биэрэр этэ. Кини көҕүлээһинин ыччаттар иилэ хабан ылан, маассабай үтүө дьыалаҕа кубулуттулар.
Ыччат көҕө диэн сүрдээх. Ыраас салгыҥҥа көҥүл көччүйэн, доҕоттору кытары күлэ-үөрэ, эдэр эрчиминэн үлэлии-хамсыы сылдьар, ону тэҥэ кыаммат дьоҥҥо көмөлөһөр, үтүөнү оҥорор саҕа үчүгэй туох баар буолуой!
Оттон кырдьаҕастар үөрэр, махтанар эрэ буоллахтара. Кинилэр бэйэлэрэ муус ылар, тиэйэр кыахтара суох. Атыылаһарга эрэ тиийэллэр. Бэрдьигэстээххэ муус тиэммит УАЗ массыына балтараа тыһыынча солкуобайга аҕалан биэрэр. Кыстыгы икки-үс массыына мууһунан туоруохха сөп. Онон кырдьаҕастар биэнсийэлэриттэн 3-5 тыһыынча солкуобайы кэмчилииллэр.
Дьиҥинэн, дьыала харчытыгар буолбатах. Үтүө дьыала, аһымал санаа киһини Киһи оҥорор. Күчүмэҕэй күҥҥэр ким эрэ эйиэхэ көмөлөстөҕүнэ, илиитин утары ууннаҕына, кыһалҕа да кыччаабыкка дылы буолар. Сааһырбыт дьон кыра да кыһамньыга, болҕомтоҕо ордук наадыйаллар эбээт.
Оттон эдэр дьон сааһырбыт көлүөнэҕэ көмөлөһөллөрө – утумнааһын диэн олох суруллубатах сокуонун сөргүтүү, ыччаттарга бэйэлэригэр сиэр-майгы уруога буолар. Урут “тимуровскай үлэ” диэн маассабай хамсааһын киэҥник тэнийэ сылдьыбыта эбээт.
Атын да нэһилиэктэр, улуустар ыччаттара маннык көҕүлээһини иилэ хабан ылаллара баар суол. Холобур, Горнай улууһун атын нэиһилиэктэрэ бу холобуру батыһаллар. Мэҥэ Хаҥалас улууһун Холгума нэһилиэгин ыччаттара муҥха кэнниттэн кырдьаҕастарыгар куул аҥардыы собону биэртэлээбиттэрэ.
Ангелина ВАСИЛЬЕВА.