Владимир Солодов бэрэссэдээтэллээх бырабыыталыстыба мунньаҕар кырдьаҕас дьону көрөөччүлэр ыйдааҕы төлөбүрдэрин индексациялааһын туһунан боппуруос көрүлүннэ.
Өрөспүүбүлүкэҕэ “Кырдьаҕас дьону көрөр-истэр дьиэ кэргэттэр тустарынан” диэн сокуон үлэлиир. Ол чэрчитинэн, ыйдааҕы төлөбүр 2017 сылга – 18,5 тыһ. солк., 2018 сылга – 19,3 тыһ. солк. этэ. Оттон быйыл 20 098 солкуобайга тэҥнэстэ. Ити курдук, сыл аайы үрдээн иһэр.
Билигин өрөспүүбүлүкэ үрдүнэн кырдьаҕас, кыаммат дьону ылан көрөр-харайар 188 ыал баар. Быйыл маннык ыаллар ахсааннарын элбэтэн, 250 дьиэ кэргэҥҥэ 88 мөл. солк. биэриэхтэрэ.
Ирдэбил быһыытынан, биир ыал иккиттэн ордук киһини ылыа суохтаах. Туспа хос аныахтаахтар, эбэтэр кырдьаҕас бэйэтин дьиэтигэр күҥҥэ хаста да тиийэн көрүөхтээхтэр-истиэхтээхтэр. Маны социальнай отдел хонтуруоллуур.
Ирдэбил быһыытынан, аҥаардас хаалбыт, бэйэтин көрүнэр кыаҕа суох киһини, дьахтары — 55, эр киһини 60 сааһыттан ылар көҥүллэнэр. Ылар киһитэ ырааҕынан аймаҕа да буолуон сөп. Чуумпуну, дьиэ кэргэн сылаас эйгэтин сөбүлээччилэргэ бу саамай табыгастаах бырагыраама.
Кырдьаҕастар төрөөбүт дойдуларыттан тэйбэккэ, уопсай тэрилтэҕэ киирбэккэ, билэр ыалларыгар чугастыы хараллаллара быдан ордук. Интэринээккэ биир киһиэхэ ыйдааҕы ороскуот 45-57 тыһ. солк. тэҥнэһэр. Онон СӨ үлэҕэ, социальнай сайдыыга министиэристибэтэ интэринээттэри элбэппэккэ, кырдьаҕастары дьиэҕэ көрөр ыаллары элбэтэр соруктаах.
Ангелина ВАСИЛЬЕВА, “Саха сирэ” хаһыат, edersaas.ru