Ахсынньы 21-22 күннэригэр, Дьокуускайга, «Дохсун» спорт киинигэр «Нэһилиэк» диэн хапсаҕайга аһаҕас турнир буолла.
Бу туһунан «Нэһилиэк» бырайыак тэрийээччитэ, Нам улууһун 2-с Хомустаах нэһилиэгин баһылыга Лев Новгородов санаатын үллэһиннэ:
—Бу тэрээһин номнуо иккис сылын ыытыллар. Быйылгы күрэхтэһиибит Ил Дарханынан олорбут Егор Афанасьевич Борисов үбүлүөйүн көрсө буолла. Егор Афанасьевич «Нэһилиэк» диэн эдэр баһылыктар түмсүүлэрин куруук өйөөччү. Бу бырайыакпытын кини иккис сылын спонсордаан тэрийэбит.
Тэрээһиммитигэр уопсайа 15 улуустан 35 нэһилиэк кытынна. Манна улуустартан сылгыһыттар, тырахтарыыстар, суоппардар о.д.а кытыннылар. Бырайыакпыт сыала-соруга диэн, дьиҥ спортсменнары, хапсаҕайдьыттары буолбакка, нэһилиэктэргэ олорор, үлэлии-хамсыы сылдьар дьону кытыннарыы буолар. Икки күннээх күүрээннээх киирсии түмүгэр, Үөһээ Бүлүү улууһун Кырыкый нэһилиэгин хамаандата кыайыылааҕынан тахсан, «УАЗ» массыынаны ылары ситистилэр. Иккис миэстэҕэ Нам улууһун 2-с Хомустаах нэһилиэгин олохтоохторо тахсан 100 тыһыынча солкуобайы бириис туттулар. Үһүс миэстэҕэ Томпо улууһун Кириэс-Халдьаайы нэһилиэгин олохтоохторо тиксэн 50 тыһыынча солкуобайынан наҕараадаланнылар.
Түгэнинэн туһанан бары спонсордарбытыгар, тэрийээччилэрбитигэр, чуолаан, сүрүн судьуйа Андрей Яковлевка, Гавриил Семеновка, Николай Бястиновка, Софрон Поповка, Василий Даниловка, Николай Тарасовка, Марианна Лихаруковаҕа уонна Нөмүгү килиэп буһарар собуотун тэрилтэтигэр барҕа махталбытын тиэрдэбит.
Ульяна ЗАХАРОВА, «Саха сирэ» хаһыат, edersaas.ru