Бүгүн «Кыайыыга дьулуһан» диэн ааттаах кинигэни туттум уонна үөрүүбүн үллэстиэхпин баҕарабын.
edersaas.ru, Марта Николаева
1941-45 сылларга Улуу Кыайыыны уһансыбыт дьоммутугар аналлаах сүгүрүйүү, махтал иэйиитин 25 хоһоонньут суруйан, ити эппит кинигэбэр бэчээттэммит. Бу бырайыагы » Уран тыл оһуора» түмсүү хоһоонньуттарын салайааччыта Раиса Николаевна Тимофеева-Михайлова сүүрэн-көтөн,толкуйдаан таһаарбыт бырайыага буолар. Онон Кыайыы өрөгөйдөөх үбүлүөйүнэн аҕа дойдуну көмүскээбит көлүөнэбитигэр махтал бэлиэтэ буолар. Онон бу бырайыагы толкуйдаабыт, хоһооҥҥо саҥа холоно сатыыр дьоҥҥо, салайааччыбыт Раиса Николаевна үтүөтэ барыбытыгар холобур. Кинигэ ХИФУ издательствотыгар бэчээттэнэн таҕыста. Онон биһиги төрөөбүт нэһилиэкпит, улууспут библиотекатын фондатыгар бэлэхтииргэ утары уунардаах буоллубут.
Мин отучча сыл суруналыыстыкаҕа үлэлээбитим да биирдэ да хоһоон суруйан холонон көрбүт, оннооҕор кинигэҕэ да бэчээттэммитэ суох. Бассаабынан чугас дьоммор иэйиилэрбин суруйарбын бэлиэтии көрөн, дьүөгэм Каджана Николаевна хоһоонньуттар бөлөхтөрүгэр билсиһиннэрэн, өссө ийэлээх аҕабар хоһоон анаан, син Кыайыы үбүлүөйүгэр кыттыгастаах курдук сананабын. Аҕам Николаев Тимофей Иннокентьевич сэрии кыттыылааҕа, 1942 сыллаахха Брянскай фроҥҥа ыҥырыллан, дойдутугар 1947 сыллаахха кэлбитэ. Ийэм Яковлева Екатерина Петровна тыыл бэтэрээнэ,уончалаах сааһыттан колхозка үлэлээбитэ. Онон ытык дьоммутугар сүгүрүйүү, ытыктабыл бэлиэтэ хоһоонунан тиһилиннэ.
Бу кинигэҕэ биир дойдулаахтарым К.Евсеева,Сунтаардааҕы оҕо саадыгар үлэлии сылдьар Екатерина Коротова, П.Тумусова хооонноро бэчээттэммит.
Салайааччыбыт Раиса Николаевна тоҕус кинигэ ааптара, элбэх айар дьон хоһоонноро бэчээттэнэригэр көмөлөспүт улахан үтүөлээх киһи буолар. Бырайыактара да элбэх. Кыайыы 75 сыллаах үбүлүөйүгэр түмсүү ааҕааччы киэҥ араҥатыгар үтүө бэлэх уунна.
Марта Николаева, суруналыыс, edersaas.ru саайтка анаан