Ыам ыйын 10 күнүгэр Дьокуускай куоракка Улуу Кыайыы 75 сылын көрсүү чэрчитинэн саҕаламмыт Кыайыы Знамятын өрөспүүбүлүкэтээҕи эстафетата Бүлүү улууһугар кэллэ.
Знамяны бэҕэһээ, ол эбэтэр ыам ыйын 20 күнүгэр, Горнай улууһун баһылыгын бастакы солбуйааччы В.В.Степанов салайааччылаах дэлэгээссийэ Горнай улууһа Бүлүү улууһун кытары быысаһар сиригэр аҕалан, Бүлүү улууһун баһылыгын социальнай бэлиитикэҕэ солбуйааччы Л.Я.Кононоваҕа үөрүүлээх быһыыга-майгыга туттарда.
Салгыы эстафета Илбэҥэ нэһилиэгэр, баһылык Е.А.Николаевка бэрилиннэ. Знамяны көрсүү сиэрэ-туома Илбэҥэ бөһүөлэгэр, Кыайыы искибиэригэр өрө көтөҕүллүүлээх быһыыга-майгыга буолла. Элбэх үтүө тыл этилиннэ, хомоҕой хоһоон, ырыа толорулунна.
Бу историческай суолталаах эстафетаны улууспутугар көрсүүгэ улуус военкома С.Н.Харлампьев, эйэлээх кэмҥэ сэрии уотун ааспыт бэтэрээн К.Х.Егоров, улуус дьаһалтатын култуураҕа, дьиэ кэргэни, ыччаты кытары үлэлиир салааларын бэрэстэбиитэллэрэ итиэннэ Илбэҥэ нэһилиэгин ытык кырдьаҕастара, бэтэрээннэрин сүбэтэ, далбар хотуттара, ыччаттара кытыннылар.
Кыайыы Знамята салгыы нэһилиэктэринэн бэриллэн, ыам ыйын 29 күнүгэр Бүлүү куоратыгар кэлиэ, сарсыныгар, ол эбэтэр ыам ыйын 30 күнүгэр, ыаллыы Үөһээ Бүлүү улууһугар туттарыллыаҕа. Улуу Кыайыы символын, Кыһыл Знамя, ытык суолтатын үс Дьоруойдаах ытык Бүлүү улууһун бары олохтоохторо өйдөөн, сыаналаан ыытыллар эстафетаҕа кыттыһыахтара диэн бигэтик эрэнэбит.
«Саха сирэ» хаһыакка, edersaas.ru. саайтка анаан
Илбэҥэттэн Егор Николаев.