Дьокуускай куорат 17-с №-дээх орто оскуолатын алын сүһүөх кылааһын учуутала Валентина Коротова үөрэтэр оҕолоро өрүү бастыҥнар ахсааннарыгар сылдьаллар.
Үрдүк категориялаах учуутал, СӨ үөрэхтээһинин туйгуна, Сунтаар улууһун баһылыгын Гранын хаһаайката, «Сыл учуутала» улуустааҕы учуутал куонкуруһун кыайыылааҕа, » Саха Өрөспүүбүлүкэтин бастыҥ учуутала» курдук ааттаах-суоллаах педагог Валентина Коротова бары солотун суруйдаххына, бүгүн бүппэккин.
Быйыл бастыҥ учуутал үөрэтэр кылааһын 40 оҕо бүтэрдэ. Онтон тоҕус оҕо ФТЛ-га (физико-техническэй лицей), алта оҕо куорат лицейигэр (куорат гимназията), 20 оҕо физика-математика анал кылааһыгар үөрэнэ киирдилэр.
17-с оскуола бастыҥ үөрэнээччитэ Максим Крылыков Москва куоракка Бүтүн Арассыыйатааҕы олимпиада кыайыылааҕынан буолаат: «Мин бу ситиһиибин учууталбар Валентина Иннокентьевнаҕа аныыбын», — диэн Саха телевидениетигэр сонуннарга бэрт дуоспуруннаахтык уонна улахан киһилии боччумуран киэн тутта эппитэ үгүс киһи өйүгэр-санаатыгар хаалбыта чахчы.
Талааннаах уолчаан Болгарияҕа ыытыллыбыт математика олимпиадатыгар 3-с миэстэни ылан, учууталын өссө үөрдүбүтэ.
Валентина Иннокентьевнаттан: «Үлэҕэр саамай сөбүлүүр түгэниҥ?» — диэн ыйыппыппар: «Саҥа тиэмэни быһаарыы — олоххо олугу ууруу кэриэтэ. Бу түгэн саҕа миэхэ күндү суох. Ол иһин, ис испиттэн аһыллан туран быһаарабын. Билигин саҥа ФГҮөС тосхолунан үлэлиир буолан, оҕо толкуйдуур дьоҕурун сайыннарыыга болҕомто ууруллар. Онон үөрэнээччи уруок тиэмэтин учууталы кытта ырытар, анаарар буолла, — диэн кэпсиир.
Талааннаах учуутал үөрэтэр оҕолорун дьоҕурдарын арыйар өссө биир сонун ньымалаах. Бүлүүтээҕи педучилищеҕа бииргэ үөрэммит дьүөгэтэ, педагогическай наука кандидата Лилия Алексееваны кытта бииргэ үлэлэһэн, оҕо араатардыыр дьоҕурун сайыннараллар. Ол түмүгэр, килбик оҕо ис туруга аһыллан, телевидениеҕэ, араадьыйаҕа кытта биэриилэри ыытарга тиийэ үүммүттэр. Оннук холобурдара үгүс. Мин санаабар, учуутал уонна иитээччи оҕону дьон ортотугар саҥарда үөрэттэхтэринэ, оҕо ис кыаҕа ордук арыллан, салайааччыга тиийэ үүнэр кыахтаах.
Бүгүн оҕо-аймах тапталлаах учуутала, «Үөрэнээччи билиниитэ» диэн үөрэхтээһин эйгэтигэр саамай үрдүк наҕараада хаһаайката Валентина Коротова кэрэ-бэлиэ үбүлүөйдээх күнэ. Биллэн турар, бу күн Валентина Иннокентьевнаҕа эҕэрдэ бастыҥа этиллиэҕэ, чугас дьоно тапталларын күүһүгэр билиниэхтэрэ. Үтүө киһи кэллиэгэлэрин истиҥ тылларын истиэҕэ уонна саамай күндү бэлэҕинэн, ыраахтан-чугастан үөрэппит оҕолорун махтал тыллара учуутал дууһатын угуттуохтара.
Төрөөбүт күҥҥүнэн, үөрэнээччигэ Кыайыы көтөлүн бэлэхтиир Учуутал!
Елена ПОТОЦКАЯ, «Саха сирэ» хаһыат, edersaas.ru