Кыайыы күнүгэр Быладыыка Роман саҥа тутуллар храм куупалын сибэтии гынна
Дьокуускайга, Новопортовской микро-оройуоҥҥа, аҕа дойдуну көмүскүүр Улуу сэриигэ өлбүт буойуттар кэриэстэригэр анаан, Бары Сибэтиэйдэр храмнарын тутуу 2015 сыллаахха саҕаламмыта.
edersaas.ru
Бэҕэһээ, Улуу Кыайыы 75 сылынан, Саха сиринээҕи уонна Өлүөнэтээҕи архиепископ Быладыыка Роман бу храм куупалын уонна кириэһин сибэтии гынна.
– Куупалы сибэтии гыныы Ийэ дойду көҥүлүн иһин сырдык тыыннарын толук уурбут буойуттарга анаммыт храм олоххо киирэрин кэтэһэр бары итэҕэйээччилэргэ уонна куорат олохтоохторугар эрэли угар тутуу биир сүрүн түһүмэҕэ буолар. Бу храм кинилэр үбүлээһиннэринэн тутуллар. Храмнар норуот күүһүнэн тутуллаллар, онон, норуот сибэтиинньэлэрэ буолаллар, – диэн бэлиэтээтэ Быладыыка.
Мэлиибэн кэнниттэн архиепископ Быладыыка Роман бу храм тутуутун бэпэчиитэллэрин сэбиэтин салайар Ил Дархан Айсен Николаевка, тутааччыларга уонна тутууну үбүлээччилэргэ махтанарын биллэрдэ.
— Биэс сыллааҕыта биһиги саҥа тутуу акылаатын түһэрбиппит, оттон күн бүгүн өрөспүүбүкүлэ биир кэрэ көстүүлээх храма буолан эрэрин көрөбүт. Биһиги аҕаларбыт, эһэлэрбит кыа хааннарын тоҕон аҕалбыт Улуу Кыайыыларыгар ананар Бары Сибэтиэйдэр храмнара Улуу Кыайыы 75 сыллаах үбүлүөйүгэр сибэтии гыныллара олус үөрүүлээх, долгутуулаах. Сэриигэ охтубуттар сырдык кэриэстэрэ умнуллубат, – диэтэ Айсен Николаев.
Бу туһунан Ил Дархан уонна Бырабыыталыстыба пресс-сулууспата иһитиннэрэр.
Раиса Сибирякова, «Саха сирэ» хаһыат, edersaas
Хаартыскаларга Мария Васильева (СИА) түһэриилэрэ.