Дьокуускайга кыһыл көмүс тугутчаан абылыыр ураты күүһүн туһунан испэктээк оҕолору А.Е.Кулаковскай аатынан норуоттар доҕордоһууларын дьиэтигэр ыҥырар. Күүттэриилээх Саҥа дьыл бырааһынньыгар ураты кэрэни, остуоруйа курдук дьиктини, соһуччу үөрүүлээҕи кэтэһэр-манаһар кырачааннарга, бу күн, кырдьык да, кыһыл көмүс тугутчаан, буурҕа уонна силлиэ королевата ыалдьыттыахтара. Оттон сур бөрөлөрү кытары киирсии, уйаара-кэйээрэ биллибэт хоту дойдуга айан итиэннэ онно олорор дьон көрдөөх-нардаах, тэтимнээх үҥкүүлэрэ оҕолору тэҥҥэ үҥкүүлэтиэ. Бу туһунан биһиэхэ норуоттар доҕордоһууларын дьиэтин пресс-сулууспатыттан иһитиннэрэллэр.
Жанна Николаева, А.Е.Кулаковскай аатынан норуоттар доҕордоһууларын дьиэтин художественнай салайааччыта:
—-Бу алыптаах остуоруйаҕа барыта 19 эҥинэ бэйэлээх үчүгэйкээн көстүүм арааһа тигилиннэ. Сүрүн худуоһунньук Эдуард Тойтонов киһи эрэ болҕомтотун тардар, абылыыр олус үчүгэй саҥа көстүүнү сыанаҕа толкуйдаата. Оттон испэктээк сүрүн тиэмэтинэн — хоту сир буолла. Санатан аастахха, Сомоҕолоһуу сылыгар Саха сирин аҕыс хотугу оройуона Арассыыйа Арктикатааҕы зонатыгар киллэриллибиттэрэ. Маныаха даҕаттахха, дьиҥэр, испэктээк идиэйэтэ өссө эрдэ толкуйдаммыта. Ону кэпсэтэрбитигэр, ырытарбытыгар, дьүүллэһэрбитигэр Арктика хаһаайката, дьүкээбил уота, о.д.а. персонажтар үөскээн тахсыбыттара. Испэктээк режиссера, балетмейстер Людмила Антипина испэктээгинэн оҕолор хотугу норуоттар үгэстэрин, култуураларын үчүгэйдик билэллэригэр, өйдүүллэригэр анаан бэлиэлэри оҥорорго этии киллэрбитэ. Ол курдук, холобур, айылҕа уратытын кытары ситимниир дүҥүр, хоту дойду дьоно-сэргэтэ таптыыр, сэргиир, уостан түһэрбэт номох оҥостор, сүгүрүйэр кыһыл көмүс тугутчааннара үөскээн тахсыбыттара. Сценарийын оҥорууга норуоттар доҕордоһууларын дьиэтин исписэлииһэ Марина Павлова көхтөөх кыттыыны ылла.
Көрөөччүнү манньытар, үөрдэр чаҕылхай шоуга биһиги тапталлаах тэрилтэбит үрдүкү кылаастаах айар биригээдэтэ бэриниилээхтик, өрө көтөҕүллэн үлэлэһэр. Испэктээккэ эдэркээн артыыстар, норуоттар доҕордоһууларын дьиэтин айар кэлэктииптэрин иитиллээччилэрэ: «Сырдык сүүрээн» диэн норуодунай артыыстар Екатерина уонна Алексей Егоровтар вокальнай устуудьуйалара, «Сюрприз» киэҥник биллэр кэлэктиип, «Ярилов день» үҥкүү ансаамбыла (сал. Ирина Егорова), «Тетрис» аныгы үҥкүү (сал. Тамара Савочкина, Татьяна Матюшенко), «Сандал» оҕо үҥкүүтүн (сал. Сардана Катакова), «Аюлна» ансаамбыллар (сал. Василий Старостин),ону сэргэ, С.А.Зверев — Кыыл Уолун аатынан үҥкүү национальнай тыйаатырын артыыстара үөрэ-көтө кытталлар.
Биир чаастаах бэртээхэй көрдөрүү кэнниттэн, кырасыабай, улахан харыйалаах саалаҕа оҕолору Тымныы оҕонньору, аниматордары кытары үҥкүү-битии, көр-күлүү, оонньуу арааһа күүтэр. Бэртээхэй испэктээккэ ахсынньы 27-29, тохсунньу 2—7 күннэригэр кэлэн ыалдьыттааҥ.
Айталина АРГУНОВА хаартыскаларга түһэриитэ.