Тыа хаһаайыстыбатын министиэристибэтигэр кыстык хаамыытыгар анаммыт сүбэ мунньах буолла.
Миниистири солбуйааччы Николай Афанасьев иһитиннэрбитинэн, бас билии көрүҥүттэн тутулуга суох өрөспүүбүлүкэ үрдүнэн 184 978 ынах сүөһү (былырыыҥҥы сыл туһааннаах кэм 100,8 %-на), 186 270 сылгы (былырыыҥҥы сыл туһааннаах кэм 104,6 % ) кыстатыллан турар. Сайын устата 471,5 тыһыынча туонна от бэлэмнэммититтэн, билиҥҥи туругунан, 335,496 тыһыынча туонна от баар. 11 129 сылгы эбии аһылыкка киирбит. Ордук элбэх сылгы Тааттаҕа (2325), Чурапчыга (2064), Үөһээ Бүлүүгэ (1546) уонна Амма улууһугар (1440) аһаан турар эбит. Санатан эттэххэ, былырыын баччаларга 5 233 сылгы, кыстык устатыгар 46 453 сылгы эбии аһатыллыбыта.
Улуустар бэрэстэбиитэллэрэ сырдаппыттарынан, кыстык кэминэн баран иһэр. Табаҕа уонна ыраах учаастактарга сылдьар сылгыларга адьырҕа кыыллар суоһууллар. Булчуттар ааспыт сылга 358 бөрөнү, 29 эһэни өлөрбүттэр, быйыл да бултаһа сылдьаллар. Отторо тиийбэт улуустарга (Дьааҥыга, Горнайга, Томпоҕо, Уус Алдаҥҥа) оту тиэрдии саҕаламмыт. Сүбэ мунньаҕы түмүктүүрүгэр, миниистир Александр Атласов кыстык хаамыытын хонтуруолга тутарга, үөскүүр боппуруостары уталыппакка быһаарарга суһал ыстааптары тэрийэргэ эттэ.
Раиса Сибирякова, «Саха сирэ» хаһыат, edersaas.ru