Өрө тутуллар «Куорат тупсаҕай эйгэтин тэрийии» бырайыак чэрчитинэн, Дьокуускай куораты тупсарыыга, киэргэтиигэ олохтоохтортон этиилэри хомуйууга кыттааччы элбээн иһэр.
Киин куорат дьаһалтатын Архитектураҕа уонна куораты тутуу бэлиитикэтигэр управлениетын чахчытынан, күн бүгүҥҥү туругунан, куорат 80 уопсастыбаннай сирдэрин тупсаран оҥорууга 7 тыһ. этии киирдэ. Ордук тупсаҕай бырайыактар кулун тутарга куоластааһыҥҥа таһаарыллыахтара, бастаабыттар олоххо киллэриллиэхтэрэ.
Санатан эттэххэ, этиилэр олунньу 9 күнүгэр диэри куорат, куораттааҕы уокуруктар уонна куорат таһынааҕы бөһүөлэктэр дьаһалталарыгар, ону сэргэ «Туймаада» эргиэн киинигэр (Орджоникидзе аатынан уулусса 38 №-гэр), 1 №-дээх поликлиникаҕа (Киров уул. 19 №-гэр), «Мин докумуоннарым» ЭФК (Аммосов уул. 18 №-гэр), «УлуруМолл» эргиэн киинигэр (Кальвица уул. 14/5 №-гэр) хомуйуллаллар. Электроннай сайаапкалары маннык аадырыстарга түһэриллэр: e-mail: dgp.yakutsk@mail.ru, оттон куорат порталыгар OneclickYakutsk «Городская среда» салааҕа, http://www.oneclickyakutsk.ru/Ideas/411.aspx.
Раиса СИБИРЯКОВА, Саха сирэ” хаһыат, edersaas.ru